Месси отаси билан вақт ўтказиш учун Росариога йўл олди 

Аргентина терма жамоаси сардори Лионель Месси Жаҳон чемпионатидан сўнг даволанаётган отаси билан вақт ўтказиш учун Росариога йўл олди. Бу ҳақда ESPN хабар берди.

Месси Жаҳон чемпионатидан кейин Аргентинага қайтган. Бироқ у миллий терма жамоадан алоҳида равишда уйига жўнаб кетган. Терма жамоанинг асосий қисми эса Жаҳон чемпионати финалида Испанияга қўшимча вақтда мағлуб бўлганидан кейин Нью-Йоркдан Буэнос-Айресга қайтган.

Жаҳон чемпионати давомида Лионель Мессининг отаси Хорхе Мессининг соғлиғи ёмонлашгани маълум бўлди. La Opinion нашрининг ёзишича, футболчининг Аргентинанинг Жазоирга қарши мусобақадаги илк учрашувида (3:0) биринчи голни ургач кўз ёш тўккани айнан отасининг касаллиги билан боғлиқ бўлиши мумкин.

Мессининг оиласи касаллик тафсилотларини ошкор қилмаган, бироқ Хорхе Месси ҳозирда даволанаётганини тасдиқлаган.

39 ёшли Лионель Месси 2023 йилдан буён АҚШнинг MLS чемпионатида иштирок этувчи “Интер Майами” клуби сафида тўп суриб келмоқда.

Европада у “Барселона” ва “Пари Сен-Жермен” клублари шарафини ҳам ҳимоя қилган. “Барселона” сафида тўрт марта Чемпионлар лигаси, уч марта UEFA Суперкубоги ва уч марта Клублар ўртасидаги Жаҳон чемпионатида ғолиб чиққан.

Эслатиб ўтамиз, Аргентинанинг Жазоирга қарши учрашувидан сўнг аргентиналик телебошловчи Лионель Мессининг отаси вафот этгани ҳақида нотўғри маълумот тарқатган эди. Кейинчалик бу хабар ҳақиқатга тўғри келмаслиги маълум бўлди.