Месси “Олтин тўп” учун асосий фаворитга айланди – ОАВ

Аргентина терма жамоаси ҳужумчиси Лионель Месси 2026 йилги “Олтин тўп” мукофотини қўлга киритиш учун асосий фаворит ҳисобланмоқда. Бу ҳақда “Polymarket” нашри хабар берди.

Нашр баҳолашига кўра, Мессининг ғолиб бўлиш эҳтимоли 40,2 фоизни ташкил этади. Иккинчи ўринда Испания терма жамоаси ҳужумчиси Ламин Ямаль (27,5%), учинчи поғонада эса Англия терма жамоаси сардори Ҳарри Кейн (15,8%) жойлашган.

Месси 2026 йилги Жаҳон чемпионати гуруҳ босқичидан кейин “The Athletic” нашрининг “Олтин тўп” фаворитлари рейтингига киритилган эди. Бунга унинг турнирда олтита гол уриб, тўпурарлар пойгасида пешқадамга айлангани ҳамда мундиал тарихида янги натижа қайд этгани сабаб бўлган. Кейинчалик “Олтин тўп” ташкилотчилари ҳам унинг мукофот учун асосий даъвогарлардан бири эканини тасдиқлади.

“Олтин тўп” жаҳон футболидаги энг нуфузли индивидуал мукофот ҳисобланади. У 1956 йилдан буён топшириб келинади. 1994 йилгача ушбу соврин фақат Европа клубларида тўп сураётган европалик футболчиларга берилар эди. 1995 йилдан бошлаб Европа клубларида ўйнайдиган барча мамлакат вакиллари мукофот учун даъвогарга айланди. Ўша йили либериялик ҳужумчи Жорж Веа “Олтин тўп”ни қўлга киритган биринчи европалик бўлмаган футболчи бўлди.

2007 йилдан эътиборан эса дунёнинг исталган клубида ҳаракат қилаётган футболчилар мазкур мукофот учун курашиш ҳуқуқига эга бўлди. Месси ҳозиргача рекорд даражада — саккиз марта “Олтин тўп” мукофотини қўлга киритган.