Месси Финалиссима бекор қилинишидан хафа бўлди – ОАВ

Аргентина терма жамоаси сардори Лионель Месси Финалиссима ўйинининг бекор қилинишидан ҳафсаласи пир бўлди. Бу ҳақда ESPN хабар берди.

“Интер Майами” сардори ушбу учрашувга катта умидлар билан тайёргарлик кўраётган эди ва уни 2026 йилги Жаҳон чемпионатига тайёргарлик доирасидаги муҳим ўйин сифатида баҳолаган. Бироқ, манбаларга кўра, Месси ўйиннинг бекор қилинишига олиб келган музокараларда иштирок этмаган.

2024 йилги Америка кубоги ғолиби Аргентина ҳамда 2024 йилги Европа чемпиони Испания ўртасидаги учрашув дастлаб жорий йилнинг 27 март куни Қатарда ўтказилиши режалаштирилган эди. Аммо минтақадаги сиёсий кескинлик сабаб ўйин бекор қилинди.

UEFA баёнотида айтилишича, Қатарда ўйинни ўтказиш бўйича кўплаб музокаралар олиб борилган, бироқ ҳудуддаги ҳозирги вазият сабаб учрашувни ўтказишнинг имкони бўлмаган. Ташкилот бошқа вариантларни ҳам кўриб чиққан, аммо уларнинг барчаси Аргентина футбол ассоциацияси учун мақбул бўлмаган.

Жанубий Америка футбол конфедерацияси (CONMEBOL) эса муқобил жойлар ва саналар таклиф қилинганини, бироқ UEFA уларни қабул қилмаганини маълум қилди. Аргентина томони ўйинни жорий йилнинг 31 март куни ўтказишни таклиф қилган, бироқ UEFA бу санада учрашувни ўтказиш мумкин эмаслигини билдирган. Натижада Финалиссима бекор қилинган.

Манбаларга кўра, Месси бу ўйинни фаолиятидаги 49-жамоавий совринни қўлга киритиш имконияти сифатида кўрган. У сўнгги бор 2025 йилнинг декабрь ойида MLS кубогида “Интер Маями” билан чемпионликни қўлга киритган эди.