Мендан ўрнак олманглар – Шесни 

Польша терма жамоаси ва “Барселона” клуби дарвозабони Войцех Шесни чекиш билан курашда мағлуб бўлганини айтиб, бошқаларни ундан ўрнак олмасликка чақирди. Бу ҳақда ESPN нашри хабар берди.

“Чекиш ҳақида гап кетганда, илтимос, менга эргашманг ва бу ишни асло қила кўрманг. Мен бу курашда ютқаздим. Менга жуда салбий таъсир кўрсатадиган бу нарса менга жуда ёш пайтимда одат бўлиб қолган. Замонавий футболчилар учун чекиш ёки ичиш ҳақида очиқчасига гапириш одатий ҳол эмас. Бироқ мен бу борада ростгўйман, чунки мен сиёсатчи эмасман. Мен шунчаки дарвозабонман. Тўпни ушлашим ва тепишим керак, холос”, дейди Шенсни.

Қайд этилишича, 35 ёшли Шесни мавсум бошида фаолиятини қайта тиклаганидан кейин “Барселона”нинг асосий посбонига айланди. Дарвозабон ўзининг ёмон одати борлигини очиқчасига тан олишини инобатга олган ҳолда, мухлислар Каталония жамоасининг ўйинларида мунтазам равишда “Шенсни кашанда”, деб ҳайқиришади.

Маълумот ўрнида, дарвозабон ўтган йилнинг октябрь ойида асосий дарвозабон Марк-Андре тер Штегеннинг жароҳатидан сўнг “Барса” сафига келиб қўшилган. Польшалик посбон 2025 йил бошида асосий жамоадан жой олди ва клубнинг тимсолига айланди. Каталонияликлар 25 ўйинда бор-йўғи бир марта, шу ҳам бўлса, Чемпионлар Лигаси чорак финалининг жавоб ўйинида Дортмунднинг “Боруссия”сига 3:1 ҳисобида мағлуб бўлди.