“Мен уни соғинаман”. Норвегия янги қиролининг риторикаси одамларни йиғлатди

Норвегия қироли Ҳаакон VIII 28 август куни тахтга келганидан кейин халққа қилган илк мурожаатида марҳум отаси Харальдни илиқ сўзлар билан ёдга олди. Бу ҳақда “Reuters” хабар берди.

Қайд этилишича, қирол Ҳаакон VIII отаси Харальдни “жуда яхши ота” бўлгани учун миннатдорлик билан эслаб, унинг кулгиси ва одамлар билан самимий муносабатини соғинишини айтган. Мурожаат давомида у бева қолган онаси қиролича Соняни тилга олганида овозида ҳаяжон сезилган.

Қора костюм, оқ кўйлак ва қора галстукда чиқиш қилган Ҳааконнинг саройда ёзиб олинган телемурожаатида отасини оилапарвар инсон сифатида таърифлаган.

“Азиз отам, Марта ва мен учун шундай яхши ота бўлганингиз учун раҳмат”, деган у синглиси, малика Марта Луизани назарда тутиб.

“Мен уни соғинаман. Унинг кулгисини соғинаман. Одамлар ва турли вазиятларга хайрхоҳлик билан муносабатда бўлишини соғинаман”, деган Ҳаакон.

У шунингдек, кеча, 29 август куни Харальд ва қиролича Сонянинг турмуш қурганига 58 йил тўлиши керак бўлганини таъкидлаган.

“Тўй йиллигингиз билан табриклайман, азиз онажон”, деган Ҳаакон. Бу сўзларни айтганида унинг овозида қисқа муддат ҳаяжон сезилган.
 

“Биз ягона халқмиз”

Билдирилишича, Ҳаакон отаси каби ўз фаолиятини ўз услубида олиб боришини таъкидлаган. Шунингдек, у конституциявий монархия тамойилларига содиқлигини билдирган.

Маълум қилинишича, қирол 1 сентябрь куни парламентда мамлакат Конституцияси ва қонунларини ҳимоя қилишга қасамёд қилади.

“Биз ўзимизни ўзимиз бошқариш тизимимизга ва демократияга ишонамиз. Биз қонун устуворлигига асосланган жамиятга, унда ҳар бир инсон тенг қадр-қимматга эга эканига ишонамиз”, деган Ҳаакон.

Норвегия конституциявий монархия бўлгани сабабли Ҳаакон отаси вафот этиши билан автоматик равишда қиролга айланган. Қайд этилишича, мамлакатда тож кийдириш маросими ўтказилмайди, чунки бу анъана 1908 йилда парламент томонидан бекор қилинган.

“Биз ҳар бир инсон учун жой бор Норвегияга ишонамиз. Биз жамиятимизнинг кучини ҳис қиламиз ва қалбимизда ягона халқ эканимизни биламиз”, деган қирол.

Мурожаат якунида сарой ташқарида марҳум қирол билан хайрлашиш учун йиғилган одамлар телефонлари орқали нутқни томоша қилиб, ўз-ўзидан қарсак чалишган.

Бош вазир Йонас Гар Сторе ҳам Ҳаакон отасининг кўплаб фазилатларини ўзида мужассам этганини айтган.

“Бу қирол отасидан одамлар ўртасида бирдамлик муҳитини яратиш қобилиятини олган”, деган у сарой ташқарисида “Reuters” агентлигига берган интервьюсида.

Эслатиб ўтамиз, жорий йилнинг 28 август куни Европанинг амалдаги энг кекса монархи – Норвегия қироли Харальд V 89 ёшида вафот этганди. Харальд вафотидан буён ўн минглаб одамлар марҳум қирол билан хайрлашиш учун қироллик саройига ташриф буюрмоқда. Унинг жасади саройда халқ билан видолашиш учун қўйилган.

Мамлакат бўйлаб байроқлар ярим туширилган. Марҳум қиролнинг тантанали либосдаги суратлари автобус бекатлари, трамвай ва метро станциялари, дўконлар, идоралар ҳамда жамоат биноларида намойиш этилмоқда.