Мен Саудияда янги ҳикоя ёзмоқчиман – Неймар

Бразилиялик ҳужумчи Неймар Франциянинг “Пари Сен-Жермен” клубидан Саудия Арабистонининг “Ал-Ҳилол” клубига ўтгани ҳақида фикр билдирди.

“Мен бу ерда янги ҳикоя ёзмоқчиман, Саудия Арабистони лигасида ақл бовар қилмайдиган даражада сифатли футболчилар ва энергия бор. Лига айни дамда катта ўсиш кўрсатмоқда, шунинг учун ишончим комилки, бу кўпчилик интиладиган жой”, дейди футболчи.

Шунингдек, Неймар “Ал-Ҳилол” клуби ҳақидаги фикрлари билан ҳам ўртоқлашди.

“Ал-Ҳилол” ажойиб мухлисларга эга жуда катта клуб, бутун Осиёнинг энг яхши жамоаси. Мен ўзим учун энг яхши клубга тўғри вақтда ўтганимни ҳис қиляпман, ғалаба қозонишни ва гол уришни яхши кўраман. Мен буни Саудия Арабистонида, “Ал-Ҳилол” таркибида давом эттиришни режалаштиряпман”, деб айтди Неймар.

Маълумот учун, Неймар 2017 йилдан бери ПСЖда ўйнаб келаётганди, у “Барселона”дан рекорд даражадаги сумма – 222 миллион евро эвазига парижликлари сафига кўчиб ўтган.