МДҲ ва ЕОИИ саммити “Игора” курорт мажмуасида бўлиб ўтади

Мустақил Давлатлар Ҳамдўстлиги давлатлари раҳбарларининг бўлажак учрашуви ва Евроосиё иқтисодий иттифоқи саммити Санкт-Петербург яқинидаги “Игора” курорт мажмуасида бўлиб ўтади. Етакчилар учун қишки спорт турлари билан боғлиқ маданий дастур тақдим этилади. Бу ҳақда Россия Федерацияси Президентининг ёрдамчиси Юрий Ушаков маълум қилди.

МДҲ давлатлари раҳбарларининг норасмий учрашуви анъанавий тарзда ҳар йили декабрь ойи охирида Санкт-Петербургда бўлиб ўтади. Кўпинча худди шу кунларда Россиянинг шимолий пойтахтида Евроосиё иқтисодий иттифоқи саммити бўлиб ўтади.

“Бу сафар бу учрашувлар Санкт-Петербургдан унча узоқ бўлмаган жойда – Ленинград вилоятида, “Игора” курорт мажмуасида бўлиб ўтади”, дейди Ушаков. 

Билдирилишича, бугун, 24 декабрь оқшомида Россия Президенти Владимир Путин Тожикистон Президенти Имомали Раҳмон билан музокаралар олиб боради. Ушбу учрашувда икки томонлама муносабатларнинг муҳим жиҳатлари – савдо-иқтисодий, ҳарбий-техникавий, маданий-гуманитар соҳалардаги масалаларни муҳокама қилиш, долзарб минтақавий муаммолар юзасидан фикр алмашиш режалаштирилган. Шунингдек, Тожикистон 2025 йилда МДҲга раислик қилишини ҳисобга олган ҳолда Россиянинг 2024 йилда МДҲга раислиги масаласини муҳокама қилиш режалаштирилган. 

“Албатта, миграция соҳасидаги долзарб масалалар муҳокама қилинади. Президентлар бу борада аллақачон келишиб олишган. Улар яккама-якка учрашиб, икки томонлама муносабатлар ва минтақавий муаммоларни, биринчи навбатда, Афғонистонни муҳокама қилади”, деди Ушаков.

25 декабрь куни МДҲ давлатлари раҳбарларининг анъанавий норасмий учрашуви бўлиб ўтади. Путин Россиянинг 2024 йилда МДҲга раислиги якунларини сарҳисоб қилади, сўнгра давлат раҳбарлари бир-бири билан норасмий мулоқотда бўлади, халқаро муаммолар, МДҲ ва бошқа бирлашмалар доирасидаги ҳамкорлик масалалари юзасидан фикр алмашади. Учрашув давомида ҳеч қандай ҳужжат имзолаш режалаштирилмаган. 

26 декабрь куни эса “Игора”да Арманистон Бош вазири Никол Пашинян раислигидаги Олий Евроосиё иқтисодий кенгаши йиғилиши бўлиб ўтади. Айнан Арманистон бу йил Евроосиё иқтисодий иттифоқига (ЕОИИ) раислик қилмоқда. 

Етакчилар ЕОИИ халқаро фаолиятининг 2025 йилга мўлжалланган асосий йўналишлари ва ташкилот бюджетини тасдиқлайди. Натижада ҳужжатлар, жумладан, Эронга ЕОИИда кузатувчи давлат мақомини бериш тўғрисидаги қарорни имзолаш режалаштирилмоқда. 2025 йил 1 январдан ЕОИИ раислиги Арманистондан Беларусга ўтади.

Хорижлик меҳмонлар учун анъанавий маданий дастур тақдим этилганми, деган саволга Президент ёрдамчиси “Игора”да бундай тадбирлар ҳам ташкил этилишини айтди.

 "Билишимча, бутун маданий дастур Игора мажмуасида бўлади", деди у.

Ушаков дастур қишки спорт турлари билан боғлиқ бўлишини таъкидлади.

Эслатиб ўтамиз, олдинроқ Ўзбекистон Республикаси Президенти Шавкат Мирзиёев Россия Федерацияси Президенти Владимир Путиннинг таклифига биноан 25-26 декабрь кунлари бўлиб ўтадиган МДҲ ва ЕОИИ саммитларида иштирок этиш учун амалий ташриф билан Санкт-Петербург шаҳрида бўлиши хабар қилинганди.