Мбаппе Франция Олимпия терма жамоаси қайдномасига киритилмади

Ҳужумчи Килиан Мбаппе футбол бўйича 2024 йилда Парижда бўлиб ўтадиган Олимпиада ўйинлари учун Франция терма жамоасининг дастлабки таркибига киритилмади. Бу ҳақда терма жамоа матбуот хизмати хабар берди.

Маълум бўлишича, Франция Президенти Эммануэль Макрон ҳужумчининг Олимпиададаги иштироки масаласини Мадриднинг “Реал” клуби президенти Флорентино Перес билан муҳокама қилишни режалаштирмоқда. Франциялик футболчининг ўзи эса Олимпиадада қатнашиш истагини билдирди.

Маълумот учун, Мбаппе 25 ёшда ва 2018 йилдан буён ПСЖда ўйнади. Жамоа таркибида футболчи беш карра Франция чемпиони, уч карра мамлакат кубоги ва суперкубоги соҳиби бўлди, икки марта Лига кубогини қўлга киритди. Миллий терма жамоа таркибида Мбаппе 2018 йил Россияда бўлиб ўтган Жаҳон чемпионатида ғолиб чиқди ва 2022 йил Қатарда бўлиб ўтган мундиал кумуш медалини қўлга киритди ва саккизта гол уриб, турнирнинг энг яхши тўпурарига айланди. 2021 йилда форвард Франция терма жамоаси билан биргаликда Миллатлар лигасида ғолиб чиқди.

2024 йилги Ёзги Олимпиада ўйинларидаги футбол мусобақалари 24 июлдан 10 августга қадар Париж ва Франциянинг бошқа олти шаҳрида бўлиб ўтади. Париждан ташқари мусобақалар Бордо, Марсель, Лион, Нант, Ницца ва Сент-Этьенда ўтказилади.