Маск Трампнинг кўз ўнгида АҚШ Давлат котиби билан жанжаллашди – ОАВ

north_east

АҚШ бюджети қисқартирилмаса, банкрот бўлади – Илон Маск

АҚШ Давлат котиби Марко Рубио ва миллиардер тадбиркор Илон Маск Оқ уйда бўлиб ўтган учрашувда қизғин баҳслашди. Бу ҳақда ўз манбасига таяниб, “The New York Times” хабар берди.

Воқеа Вазирлар Маҳкамасини қайта ташкил этиш ва давлат харажатларини қисқартиришга бағишланган йиғилиш чоғида юз берди.

Нашрнинг ёзишича, можаро бошида Маск Рубиони қўл остидагилар орасидан ҳеч кимни ишдан ҳайдамагани учун қоралаган. Бунга жавобан Давлат котиби тадбиркорни ёлғончиликда айблаб, у аллақачон Давлат департаментининг 1500 нафар ходимини қисқартирганини айтган.

Бироқ Маск ўз фикридан қайтмаган ва истеҳзо билан Рубионинг “телевидениеда яхши” эканини айтиб, унинг ҳақиқий бошқарув қарорларини қабул қила олмаслигига шама қилган.

“Бутун мулоқот АҚШ Президенти Дональд Трампнинг кўз ўнгида бўлиб ўтди, у қўлларини кесиштирган ҳолда ўриндиққа ўтириб, нима бўлаётганини кузатди”, деб ёзади NYT.

Қайд этилишича, можаро давом этар экан, Трамп ниҳоят аралашиб, Рубиони ҳимоя қилган. У Давлат котиби “аъло даражада иш” қилаётганини, хусусан, тез-тез саёҳат ва фаол оммавий ахборот воситаларида чиқишлар қилаётганини, шунингдек, ташқи сиёсат бўлимини бошқараётганини таъкидлаган.

Манбага кўра, Рубио билан жанжалдан олдин Илон Маск Транспорт вазири Шон Даффига Федерал авиация бошқармаси жиҳозларининг ҳолати ҳақида маслаҳат берган. Бироқ ҳеч ким Даффини ҳимоя қилиб гапирмаган. Аксинча, Савдо вазири Говард Лутник Маскни қўллаб-қувватлаган.

“Politico”нинг ёзишича, АҚШ Президенти Дональд Трамп оммавий ишдан бўшатиш ва миллиардернинг давлат ходимларига таҳдидлари тўлқинидан сўнг бўлиб ўтган учрашувда давлат департаментлари раҳбарларига Ҳукумат самарадорлиги департаменти (DOGE) раҳбари Илон Маск кадрлар сиёсати бўйича бир томонлама қарорлар қабул қилиш ҳуқуқига эга эмаслигини, аммо бўлимларга тавсиялар бериши мумкинлигини айтган. Учрашувда Маскнинг ўзи ҳам иштирок этган. Трампнинг бу баёноти “Маскнинг мандатини чеклаш йўлидаги биринчи жиддий қадам” бўлгани айтилмоқда.