Маск АҚШда Hyperloop тоннелини қуришни таклиф қилди

Илон Маскнинг The Boring Company компанияси Техас штатидаги икки йирик шаҳарни боғлаш учун мўлжалланган юқори тезликдаги Hyperloop тоннели концепциясини тақдим этди. Бу ҳақда “TechCrunch” хабар берди.

Қайд этилишича, Tesla ва SpaceX компаниялари асосчиси Илон Маск янги амбицияли инфратузилмавий таклиф билан чиққан. Миллиардерга тегишли The Boring Company фирмаси Техас штатидаги Остин ва Сан-Антонио шаҳарларини ўзаро боғлаши керак бўлган ерости Hyperloop магистрали концепциясини тақдим этган. Аҳоли пунктлари ўртасидаги масофа тахминан 130 километрни ташкил этади.

Компания тақдимотига кўра, лойиҳа ерости тоннелидан иборат бўлиб, у бўйлаб йўловчи ва транспорт капсулалари қисман вакуум шароитида юқори тезликда ҳаракатлана олади. The Boring Company’нинг билдиришича, лойиҳанинг амалга оширилиши Остин ва Сан-Антонио ўртасидаги йўл вақтини саноқли дақиқаларгача қисқартириш имконини беради, бу эса ерусти автомобиль трассаларидаги тирбандликни сезиларли даражада камайтиради ва ҳудуднинг транспорт боғланишини яхшилайди.

Илон Маск илк бор юқори тезликдаги вакуумли Hyperloop поездлари ғоясини 2013 йилда эълон қилган эди. Ўшандан бери концепция АҚШдаги турли йўналишлар учун бир неча бор муҳокама қилинган, бироқ ҳозирча компания Лас-Вегасдаги амалдаги комплекс каби Tesla электромобиллари учун мўлжалланган ерости Loop тоннелларини яратишга эътибор қаратган. Техасда таклиф этилган лойиҳа бошланғич муҳокама босқичида турибди ва маҳаллий ҳокимият органлари билан келишишни, экологик таъсирни баҳолашни ҳамда молиялаштириш масалаларини ҳал қилишни талаб этади.