Манхэттен метросида эркак пичоқбозлик қилди

АҚШнинг Манхэттен туманидаги метро бекатида пичоқ билан қуролланган эркак йўловчиларга ҳужум қилиб, уч кишини жароҳатлади. Полиция офицери ҳужумчига қарата ўқ узиб, уни оғир яралади. Бу ҳақда маҳаллий полицияга таяниб, CBS телеканали хабар берди.

Қайд этилишича, воқеа бугун, 11 апрель куни содир бўлган. ABC маълумотларига кўра, эркак поезд ичида ўзини ғалати тутган, сўнгра “Марказий вокзал” (Grand Central) бекати платформасида йўловчиларга ҳужум қилган. Гумонланувчи қуролни ташлаш ҳақидаги полиция талабини бажаришдан бош тортган, шундан сўнг унга қарата ўқ узилган. У оғир аҳволда шифохонага етказилган.

ABC хабарида пичоқли ҳужум оқибатида икки киши жабрлангани айтилмоқда. CBS берган маълумотга кўра эса жароҳатланганлар уч нафар: 84 ёшли эркак, 70 ёшли аёл ва 65 ёшли эркак. Полициянинг маълум қилишича, барча жабрланувчилар шифохонага ётқизилган ва аҳволи барқарор.

Шунингдек, ҳуқуқ-тартибот органлари воқеанинг терроризм билан боғлиқ белгилари йўқлигини таъкидлаган. Ҳужумчининг шахси ҳозирча ошкор этилмаган. “The New York Times” нашрининг ёзишича, бекатда поездлар ҳаракати икки йўналишда ҳам қайта йўналтирилган, турникетлар атрофидаги ҳудуд эса сариқ тасма билан ўралиб, йўловчилар учун кириш ёпиб қўйилган.

Эслатиб ўтамиз, аввалроқ АҚШнинг Мэриленд штатида жойлашган Роквилл шаҳридаги Томас Вуттон номидаги ўрта мактабда отишма содир бўлганди ва оқибатда бир нафар ўқувчи шифохонага етказилган эди.