“Манчестер Юнайтед” афсонаси Дубайда дронлар ҳужумидан ҳимояланганини айтди

Ўтган йили оиласи билан Дубайга кўчиб ўтган Англия терма жамоаси ва “Манчестер Юнайтед” собиқ ҳимоячиси Рио Фердинанд Эроннинг дрон ҳужумлари сабаб уйларининг ертўласида яширинишга мажбур бўлганини маълум қилди. Бу ҳақда Фердинанд ўзининг муаллифлик подкастида сўз очди.

Собиқ футболчи подкастида бошидан кечирганларини сўзлаб берди.

“Ростини айтсам, вазият бироз қўрқинчли эди, лекин шу билан бирга, ғалати бўлса ҳам, мен ўзимни тўлиқ хавфсиз ва ҳимояланган ҳис қилдим. Менинг студиям менинг бункеримга айланди. Барча шовқин бошланган биринчи кечада бизга ертўлага тушишни маслаҳат беришди ва у ерда ухладик. Биз бу макондан оқилона фойдаланишга ҳаракат қилдик”, дейди Рио Фердинанд.

Фердинанднинг таъкидлашича, энг қийин қисми болаларга вазиятни тушунтириш бўлган:

“Тўғриси ташқаридаги овозини эшитиш қўрқинчли бўлади. Сиз болаларга нима бўлаётганини тушунтиришингиз ва уларга бу лаҳзани бошдан кечиришда ёрдам беришингиз керак. Шунингдек, ўзингиз хотиржам бўлишга ва атрофингиздагиларни хотиржам тутишга ҳаракат қилишингиз зарур”, дея қўшимча қилди Фердинанд.

Фердинанднинг рафиқаси Кейт Фердинанд ҳам Instagram саҳифасида изоҳ қолдириб, оиладан хавотир олганларга миннатдорлик билдирди ва оиласи ҳозирда хавфсиз эканини тасдиқлади.

Маълумот учун, Рио Фердинанд 2002 йилдан 2014 йилгача “Манчестер Юнайтед” сафида ўйнаган. У клуб билан олти марта Англия Премьер-лигасида, тўрт марта Суперкубокда ғолиб чиққан, шунингдек, бир мартадан UEFA  Чемпионлар лигаси ва Клублар ўртасидаги Жаҳон чемпионатида ғолиб бўлган.