Махачев нуфузли мукофотнинг 3 та номинациясига даъвогарлик қилмоқда

2023 йил якуни бўйича World MMA Awards халқаро мукофотига номзодлар рўйхати эълон қилинди. Унга кўра, россиялик UFC жангчиси Ислом Махачев 3 та номинация бўйича мукофотга даъвогарлик қилмоқда.

Қайд этилишича, енгил вазн тоифасидаги UFC камари соҳиби Ислом Махачев жорий йилнинг 12 февралида Австралиянинг Перт шаҳрида бўлиб ўтган UFC 284 мусобақасида маҳаллий спортчи Александр Волкановски устидан қозонган ғалабаси эвазига “йил жанги” номинациясида ғолиб бўлиши мумкин. Шунингдек, 2022-йилнинг 23 октябрида Бирлашган Араб Амирликларининг Абу-Даби шаҳрида ўтказилган UFC 280 турнирида унга чемпионлик унвонини тақдим этган бразилиялик Чарльз Оливейрага қарши жанг натижасига асосан, “энг яхши сабмишн” эгаси ҳамда “йил жангчиси” бўлишга яқин турибди. 

Махачев билан бир қаторда World MMA Awards 2023 мукофотининг “йил жангчиси” номинацияси учун британиялик Леон Эдвардс, америкалик Алжамейн Стерлинг, янги зеландиялик Исраэль Адесанья ва Швейцария вакили Садибу Си ҳам иштирок этмоқда.

Айтиш жоиз, ММА'даги энг яхшиларни аниқлаб берадиган бу ташкилот рейтингидан россиялик яна бир UFC жангчиси Сергей Павлович ҳам ўрин олган бўлиб, у “йилнинг энг яхши халқаро жангчиси”, “йилнинг энг яхши ғалабалари” тоифасида ғолибликни қўлга киритиши мумкин.