Мадримовнинг навбатдаги жанги санаси маълум бўлди

WBA йўналиши бўйича собиқ жаҳон чемпиони Исроил Мадримов жорий йилнинг 30 октябрь куни Тошкентда озарбайжонлик боксчи Сеймур Исаевга қарши рингга кўтарилади. Бу ҳақда Ўзбекистон Профессионал бокс федерацияси хабар берди.

Қайд этилишича, Исроил Мадримов ва Сеймур Исаев ўртасидаги жанг Тошкентдаги “Ҳумо Арена”да бўлиб ўтади.

Мадримов 2024 йил март ойида Магомед Қурбоновни бешинчи раундда техник нокаутга учратиб, WBA камарига эга чиққанди. Шунингдек, у Теренс Кроуфорд ва Виржил Ортис каби машҳур боксчиларга қарши жанг қилган. 2026 йил январь ойида рингга қайтган Мадримов Луис Давид Салазарни очколар ҳисобида мағлуб этган.

Сеймур Исаев чап қўлда жанг қиладиган боксчи бўлиб, профессионал рингдаги нокаутлари билан танилган. У UBO версияси бўйича жаҳон чемпиони бўлган.

Маълумот учун, Мадримов профессионал фаолияти давомида WBA Inter-Continental ва IBF Inter-Continental минтақавий чемпионлик камарларини ҳам қўлга киритган. Ҳаваскорлар ўртасида эса 2017 йилги Осиё чемпионати ва 2018 йилги Осиё ўйинларида ғолиб бўлган, 2014 йилги Осиё ўйинларида 75 кг вазн тоифасида кумуш медални қўлга киритган.