Мадридда Мбаппе сурати туширилган шарфлар сотилмоқда

ПСЖ ҳужумчиси Килиан Мбаппе француз клубини тарк этиб, “Реал”га ўтиш эҳтимоли юқори. Ижтимоий тармоқларда “Сантьяго Бернабеу” стадионидаги савдо нуқталарида сотилаётган Франция терма жамоаси футболчиси расмлари акс этган Мадрид жамоаси шарфларининг суратлари тарқалди.

Маълумотларга кўра, 25 ёшли Килиан Мбаппе “Реал” билан шартноманинг якуний шартлари бўйича аллақачон келишиб олган. Шартнома 2024 йил 1 июлдан кучга киради. “Қаймоқранглилар” Мбаппе билан шартнома борасидаги барча масалаларни яқин ҳафталарда якунламоқчи, бироқ унинг трансфери мавсум тугаганидан кейин эълон қилинади.

Мбаппе 2017 йилдан бери ПСЖда ўйнаб келмоқда. 25 ёшли футболчи парижликлар билан 13 та соврин ютди. Жорий мавсумда форвард барча турнирларда 32 та ўйин ўтказиб, 32 та гол урди ва 7 та голли узатмага муаллифлик қилди. Футболчининг француз клуби билан шартномаси шу йилнинг июнь ойи охиригача амал қилади. “Transfermarkt” интернет порталига кўра, футболчининг тахминий нархи 180 миллион еврони ташкил қилади.