Маҳкумнинг “срок”ини камайтирмоқчи бўлган порахўр адвокатлар ушланди

Самарқанд вилояти туманларида маҳкумга муддатини камайтириб бериш ҳамда судда ишини енгиллатиб беришни айтиб, пора олган икки адвокат қўлга олинди. Бу ҳақда Давлат хавфсизлик хизмати хабар берди. 

Қайд этилишича, ДХХ Жиззах вилояти бўйича бошқармаси ва вилоят прокуратураси ҳамкорлигида ўтказилган тезкор тадбирда Самарқанд вилояти Ургут туманида фаолият юритувчи адвокатнинг ноқонуний ҳаракатига чек қўйилган. Мазкур адвокат мансабдор танишлари орқали Жиззах вилоятидаги манзил колонияда озодликдан маҳрум қилиш жазосини ўтаётган маҳкумнинг жазо муддатини қисқартириб бериш эвазига унинг танишидан 15 000 АҚШ доллари олган вақтида ашёвий далиллар билан ушланган.

Шунингдек, Самарқанд вилоятининг Қўшработ туманида фаолият юритувчи адвокат эса жиноят ишлари бўйича мазкур туман судида кўрилаётган жиноят иши бўйича ҳимоячи сифатида қатнашиб, мансабдор танишлари орқали судланувчига енгилроқ жазо тайинланишида ёрдам беришини айтиб, унинг ўғлидан 2 000 АҚШ доллари талаб қилган.  ДХХ ва прокуратура органлари ходимлари ҳамкорлигида ўтказилган тезкор тадбирда адвокат сўралган пул маблағини олган вақтида ушланган.

Билдирилишича, ҳозирда адвокатларга нисбатан жиноят ишлари қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Ҳуқуқни муҳофаза қилувчи органлар томонидан Самарқанд ва Қашқадарё вилоятларида давлат ташкилотларидаги мансабдорлар йўл қўйган коррупцион ҳолатларга чек қўйилган эди.