Лукашенко мухолифат излаётган “сарой” қаердалигини айтди

Олам 7683
image

Беларусь Президенти Александр Лукашенконинг “саройи” онасининг қишлоқдаги кичик уйидир. Бу ҳақда Беларусь раҳбарининг ўзи бугун, 5 март куни “Мотовело” заводи жамоаси билан суҳбат чоғида айтиб ўтди.

Суҳбатда Лукашенко мухолифат кучлари топмоқчи бўлаётган қаср тўғрисида тўхталиб ўтди.

“Тушунишингизни истайман: мен чорак асрдан бери Президент сифатида ишлайман ва агар улар (мухолифат – таҳр.) айтганидек миллиардларим ёки саройларим бўлса, мени ўнгга-чапга қилиб йиртиб ташлашган бўлар эди. Шунинг учун агар кимдир Лукашенконинг саройини топса, дарҳол у ерга кўчиб ўтиши мумкин”, дейди у.

Беларусь раҳбарига кўра, унинг мулки ҳақидаги сохта хабарлар мамлакатда вазиятни беқарорлаштириш учун ишлатилади.

“Шунинг учун, мен сизга саройим борлигини айтиб, яна такрорламоқчиман. Фикримча, етти-саккиз хонадан иборат онам мени ўстирган уй (Александрия қишлоқчасида – таҳр.) ўша менинг саройим... Қолганлари давлатга тегишли”, дейди Лукашенко.

Унинг сўзларига кўра, мухолифат бадавлат одамларнинг уйларини суратга олиб, уларни Президентга тегишли деб ўтказишга ҳаракат қилмоқда.

“Украина қулаб тушди, барча постсовет республикалари ҳам қулади, аммо Беларусь ҳанузгача маҳкам турибди. Камтармаслигим учун узр, лекин улар Лукашенко туфайли Беларусь маҳкам турганини жуда яхши билади. Шунинг учун ҳам уни (Лукашенкони – таҳр.) ҳокимиятдан ағдаришга ҳаракат қилмоқда”, дейди Беларусь раҳбари.

Эслатиб ўтамиз, Россияда ҳам сарой билан боғлиқ мавзу ўртага чиққанди. Коррупцияга қарши кураш фонди асосчиси ҳамда мухолифат етакчиси ҳисобланган ва айни вақтда панжара ортида бўлган Алексей Навальний “Путин учун сарой” номли йирик суриштирув фильмини эълон қилганди.

Бироқ орадан вақт ўтгач Россиялик миллиардер Аркадий Ротенберг саройнинг эгаси эканини очиқлаган.

Фаррухжон Муродқулов
Мақолага баҳо беринг
Баҳолаганлар: 241
Рейтинг: 2.9
t
×