Лондонда намойишчилар Ғазо учун кўчага чиқди

Кеча, 3 февраль куни Лондонда 7 октябрдан бери Исроил ҳужумларида 27 мингдан ортиқ одам ҳалок бўлган Ғазода зудлик билан ўт очишни тўхтатишга чақириш учун намойишчилар оммавий митинг ўтказди. Бу ҳақда “gnt24.com” сайти маълум қилди. 

Фаластинликлар билан бирдамлик учун минглаб одамлар Портлэнд-Плэйсдаги BBC штаб-квартираси олдида тўпланган ва кейинроқ Уайтхоллдаги Бош вазир идораси томон марш уюштирилган.

Таъкидланишича, Фаластин байроқларини кўтарган оломон, Исроилнинг Ғазога ҳужумларини тўхтатиш чақириғи билан шиорлар айтиб, Британия ҳукуматини Исроилни қўллаб-қувватлагани учун сазойи қилган.

Улар, шунингдек, "Фаластинга озодлик", "Геноцидни тўхтатинг" ва "Ҳозироқ сулҳ тузилсин" каби турли ёзувларни кўтариб олган.

Намойишчиларнинг баъзилари АҚШ ва Буюк Британиянинг Ямандаги ҳусий гуруҳларга қарши сўнгги зарбаларига норозилик сифатида "Қўлингизни Ямандан тортинг" каби шиорларни кўтарган.

Норозилик намойишида иштирок этаётган Ҳанна исмли қизнинг қайд этишича, Фаластин тарафдорлари сифатида норозилик намойишларида тўпланиш ва ҳукуматлар бўлмаса ҳам дунё Фаластин билан эканлигини кўрсатишни ўзининг бурчи деб билишини айтган.

“Атрофга назар ташласангиз, ҳар хил ёшдаги, турли миллат ва турли қатлам вакиллари бир жойга тўпланган ва бизнинг бурчимиз фаластинликларни қўллаб-қувватлаш, уларга ўзларини унутилгандек ҳис қилишлари мумкин бўлса-да, лекин улар унутилмаганлигини кўрсатишдир. Биз ҳаммамиз улар билан биргамиз", деган у.

Унга кўра, фаластинликларга тажовузлар 7 октябрдан бошланмаган.

“Бегуноҳ одамларнинг ўлдирилиши 7 октябрда бошланмаган, бу ундан анча олдин урчиган”, дея қўшимча қилган Ҳанна.

Эслатиб ўтамиз, жорий йилнинг 27 январь куни Испания Ёшлар ва болалар вазири Сира Рего бошчилигида минглаб одамлар Мадридда Фаластинни қўллаб намойишга чиққан эди.