“Ливерпуль” устунлик қилган “Интер”ни ниманинг ҳисобига енгди? Клопп тилга кирди

Бугун, 17 февраль тунда Европа Чемпионлар лигаси нимчорак финал баҳслари давом эттирилди. “Интер” майдонига сафар қилган “Ливерпуль” 2 – 0 ҳисобидаги ғалаба билан қайтган бўлса, “Залсбург” уйида меҳмон бўлган “Бавария” кутилмаганда, 1 – 1 ҳисобидаги дурранг билан ортга қайтишга мажбур бўлди. Куннинг марказий учрашуви бўлган, “Интер” ва “Ливерпуль” учрашувидан сўнг футболчи ва мураббийлар қандай фикрлар билдирди?

Мағлубиятга қарамасдан, миланликлар устози Симоне Инзаги жамоаси яхши футбол намойиш қилганини таъкидлаган.

“Футболни майда деталлар ҳал қилади. Фирминонинг боши билан берган зарбаси бугунги оқшомни ўзгартирди. Аммо бу ўйин бизга катта ишонч бағишлаши керак, чунки биз ажойиб ўйин ўтказдик. Биз мағлубиятга лойиқ эмасдик, аммо бу футбол. Ғурурланаман, чунки биз Европанинг энг яхши жамоаларидан бирига қарши ажойиб ўйин ўтказдик”, дейди италиялик мутахассис.

“Интер” ҳимоячиси Дензел Юмфрисга кўра, унинг жамоаси учун бугунги натижа адолатли бўлмади. Шу сабаб, “нерадзуррилар” “Энфилд”га фақат ғалаба қозониш учун боради.

“Ўйлашимча, биз яхши ўйнадик. Биз қаттиқ курашдик, чизиқларни маҳкам ушлаб олдик, уларга босим остида ўйнаш қийин бўлди. Якунда биз уларга гол уриш учун имкониятлар бердик, аммо 2 – 0 бу адолатли натижа эмас.  "Энфилд"га борганимизда, фақат ғалаба учун ўйнаймиз. Бу осон бўлмайди, лекин мен кучимизга ишонаман. Биз у ерга ўйнаш ва ғалаба қозониш учун борамиз”, деган миланликлар ҳимоячиси.

Ғалабадан сўнг, “Ливерпуль” устози Юрген Клопп захирадан туширган футболчиларини мақтаб ўтган, сабаби “Интер” ўйин назорат қилаётган пайтда,  Жордан Хендерсон, Наби Кейта, Луис Диас ва Роберто Фирминони майдонга тушириб, ўйинни тубдан ўзгартирди.

“Майдонга тушгач, Жордан Хендерсон ва Наби Кейта мени лол қолдиришни эплашди. Луис Диас ҳам ўзини майдонда табиий тутди. Фирмино гол урди ва унинг ўзига бўлган ишончи қайтди. Шундай қилиб, устунликни бой бериб, турган жойимизда тўсатдан тўп яна бизнинг энг яхши дўстимизга айланди ва биз ғалаба қозондик”, деган “қизиллар” устози.

“Ливерпуль” ҳимоячиси Эндрю Робертсон миланликлар намойиш қилган ўйинни алоҳида эътироф этган ҳолда, ғалабадан хурсандлигини айтган.

"Фирмино бош билан  ақл бовар қилмайдиган зарба йўллади ва биз ғалабани қўлга киритишга муваффақ бўлдик. Ҳали қилиш керак бўлган иш бор, аммо биз бугун кечқурунги натижамиздан хурсанд бўлишимиз мумкин. "Интер" ақл бовар қилмайдиган ўйин намойиш қилди ва улар бизга "Энфилд"да муаммо туғдирмоқчи. Биз энг яхши ҳолатда бўлишимиз керак”, дейди шотландиялик ҳимоячи.

Маълумот учун, жавоб учрашуви 10-март санасига белгиланган. “Интер” “Ливерпуль” майдонига сафар қилади.
 

Маъруф Абдумаликов