Кўршапалак орқали тарқаладиган хавфли вируслар аниқланди

Хитойнинг Юньнань провинциясидаги Эндемик касалликларни назорат қилиш институти олимлари кўршапалакдан янги икки хил вирусни аниқлади. Бу ҳақдаги тадқиқот PLOS Pathogens илмий журналида чоп этилди.

Маълум қилинишича, вируслар кўршапалаклардан топилган бўлиб, генетик жиҳатдан инсонлар учун хавфли саналган Nipah ва Xendra вирусларига яқин саналади. Ушбу вируслар одамда миянинг оғир яллиғланиши ва нафас йўллари касалликларига сабаб бўлиши мумкин. 

Тўрт йил давом этган тадқиқот доирасида мутахассислар Юньнаннинг беш ҳудудида йиғилган 10 турдаги 142 та кўршапалакнинг буйрак тўқималарини ўрганган. Юқори аниқликдаги DNK технологияси ёрдамида 22 та вирус аниқланган, уларнинг 20 таси илгари фанга номаълум бўлган.

Энг катта хавотирни Henipavirus туркумига мансуб иккита янги вирус уйғотган. Айнан шу туркумга юқори ўлим кўрсаткичлари билан танилган Nipah ва Xendra вируслари ҳам киради. Аниқланган янги вируслар мевали кўршапалаклардан топилган бўлиб, улар инсон яшаш жойларига яқин бўлган мевали боғлар атрофида учрайди. Тадқиқотчиларнинг таъкидлашича, бундай вируслар кўршапалак сийдиги орқали тарқалиши мумкин ва ифлосланган мевалар орқали инсонларга юқув хавфи мавжуд.

Вируслардан ташқари, олимлар Klossiella yunnanensis деб номланган янги бир ҳужайрали организмни, шунингдек, Flavobacterium yunnanensis номини олган илгари номаълум бўлган бактерияни аниқлаган.

Тадқиқот муаллифлари бу иш илк маротаба Хитойдаги кўршапалак буйракларидан топилган янги вирусларнинг тўлиқ геномини тавсифлаш имконини берганини таъкидламоқда. 

Эслатиб ўтамиз, аввалроқ Хитойда кўршапалакларда COVID-19’га ўхшаш янги коронавирус аниқланганди. Вирус HKU5 коронавирусининг янги авлоди бўлиб, Гонконгда кўршапалаклар тури бўлган япон пипистреллесида аниқланган.