Куман Ўзбекистонга қарши учрашувида асосий таркибини синаб кўрмоқчи

Нидерландия терма жамоаси бош мураббийи Рональд Куман Ўзбекистонга қарши ўртоқлик учрашувидан келаси ҳафта Японияга қарши бўлиб ўтадиган Жаҳон чемпионатининг очилиш ўйини олдидан асосий таркибни шакллантириш учун фойдаланмоқчи эканини айтди. Бу ҳақда Куман ўйин олдидан матбуот анжуманида айтиб ўтди. 

Куманнинг маълум қилишича, Нидерландия терма жамоасининг қолган футболчилари иккинчи бўлимда иштирок этади.

“Биз биринчи ўйиндан имкони борича камроқ ўзгаришлар қилиш учун фойдаланмоқчимиз. Бу режа қанчалик иш беришини кўрамиз”, дейди Куман учрашув олдидан ташкил этилган матбуот анжуманида.

Шунингдек, нидерландиялик мутахассис ушбу баҳснинг иккинчи бўлимида захира футболчиларига ҳам имконият беришини айтиб ўтди.

“Биринчи бўлимни асосан асосий таркибимиз билан ўтказамиз. Иккинчи бўлимда эса захира ўйинчилари билан. Бу ҳали тўлиқ тайёр бўлмаган ва иккинчи бўлимда ўйнаши мумкин бўлган футболчилар учун ҳам яхши имконият. Бизда 26 нафар футболчи бор ва ҳар бири ўйин амалиётига эга бўлади. Айнан шундай бўлишини хоҳлаймиз”, дейди мураббий.

Шунингдек, Куман жорий йилнинг 30 май куни “Арсенал” сафида Чемпионлар лигаси финалида иштирок этган ҳимоячи Юрриен Тимбер борасида ҳали якуний қарор қабул қилинмаган. У март ойидан бери жароҳат сабаб майдонга тушмаган эди ва унинг жисмоний ҳолати ҳозир ҳам савол остида қолмоқда.

Нидерландия терма жамоаси Жаҳон чемпионатининг “Ф” гуруҳида иштирок этади ва ўз юришини 14 июнь куни Даллас шаҳрида Японияга қарши баҳс билан бошлайди.

Ўзбекистон терма жамоаси эса “К” гуруҳидан ўрин олган бўлиб, мундиални 17 июнь куни Колумбияга қарши учрашув билан бошлайди.