Куба Президенти Трампга бўйин эгмаслигини айтди

Куба Президенти Мигель Диас-Канел Бермудес АҚШ Президенти Дональд Трампнинг босимларига бўйин эгмаслигини ва ҳали истеъфога чиқиш нияти йўқлигини билдирди. Бу ҳақда у кеча, 9 апрель куни NBS News’га берган интервьюсида сўз очди.

Диас-Канел Коммунистлар партияси ҳукмронлик қиладиган Кубани ўз тақдирини ўзи белгилаш ҳуқуқига эга бўлган эркин ва суверен давлат деб таърифлаган. Шунингдек, у орол АҚШ режаларига бўйсунмаслигини қўшимча қилган.

“Кубада раҳбарлик лавозимларида ўтирган одамлар АҚШ ҳукумати томонидан сайланмайди. Мамлакатимиз ўз тақдирини ўзи белгилаш ҳуқуқига эга бўлган эркин ва суверен давлатдир. Ҳеч қандай ташқи омил ёки таҳдидлар Кубанинг ўзини-ўзи бошқариш ваколатларини чеклаб қўя олмайди. Биз АҚШ ҳукуматининг босимларига бўйин эгмаймиз. Мен мустақил Куба давлатининг қонуний Президенти сифатида мамлакатимга босим ўтказаётган кучларга қаршилик кўрсатишга ваъда бераман. Ҳали истеъфога чиқиш ниятим йўқ. Бизнинг луғатимизда истеъфо деган сўз йўқ!” дейди Куба раҳбари.

Қайд этиш жоиз, АҚШ Президенти Дональд Трамп ўз чиқишларида Диас-Канелни мамлакатни бошқара олмайдиган нўноқ раҳбар сифатида айблаб, уни зудлик билан истеъфога чиқишини талаб қилган еди. Шунингдек, Трамп агар хоҳласа, бир кечада уни ҳокимиятдан ағдариб ташлашини, аммо буни хоҳламаслигини билдирган. Таҳдидлар айниқса, жорий йилнинг январь ойида АҚШ харбийлари Венесуэла Президенти Николас Мадурони ўғирлаганидан сўнг янада авж олган.

Трамп ўзининг Truth Social ижтимоий тармоғидаги саҳифасида Мадуронинг ўғирланишидан сўнг “Навбатда Колумбиями ёки Куба?” дея таҳдидли пост қолдирган.

“Бу буюк армияни мен қуряпман. Мен ўзимга уни ишлатмаслигимни айтдим. Лекин баъзида уни ишлатишим зарур бўлган вазиятлар юзага келади. Навбатдаги давлат эҳтимол, Куба бўлар”, деб ёзган Оқ уй раҳбари. 

Шундан сўнг, АҚШ оролга нефть блокадасини жорий этди ва Кубага нефть сотадиган ҳар қандай давлатга божлар билан таҳдид қилмоқда. 

Эслатиб ўтамиз, аввалроқ Мигель Диас-Канел америкалик конгрессменлар билан музокаралар ўтказиб, АҚШ билан мулоқотга тайёрлигини маълум қилган эди.

Ҳожиакбар Муҳаммаджонов