Комилов Афғонистон яккаланиб қолмаслиги бўйича таклиф берди 

north_east

“Буюк давлатлар Афғонистон учун ҳеч нарса қила олмади”. Комилов Эрон Президенти билан

Ҳозирги замонавий босқичда Афғонистоннинг халқаро миқёсда яккаланиб қолишига йўл қўймаслик учун ушбу мамлакатга нисбатан можародан кейинги стратегияни ишлаб чиқиш зарур. Бу ҳақда Ўзбекистон Ташқи ишлар вазири Абдулазиз Комилов Афғонистон бўйича Теҳрондаги учрашувда маълум қилди. 

Бугун, 27 октябрь куни Эроннинг пойтахти Теҳрон шаҳрида Афғонистонга қўшни давлатлар ТИВ раҳбарлари учрашувида Комилов нутқ сўзлаб, Афғонистонда мутлақо янги воқелик юзага келганини таъкидлади. 

“Афғонистонда тўлиқ ваколатли ҳамда халқаро эътирофга эга бўлишга интилаётган Муваққат ҳукумат тузилди”, дейди у. 

Вазирнинг сўзларига кўра, Афғонистон яқин келажакда минтақа давлатлари, биринчи навбатда, қўшни мамлакатларнинг миллий манфаатларига бевосита дахлдор минтақавий хавфсизликнинг муҳим омили бўлиб қолади.

Айниқса, ҳозирги замонавий босқичда ушбу давлатни халқаро миқёсда яккаланиб қолишига йўл қўймаслик учун Афғонистонга нисбатан можародан кейинги стратегияни ишлаб чиқиш зарурлиги алоҳида таъкидланди.

Хабарга кўра, форум иштирокчилари Афғонистон иқтисодиётини тиклаш, биродар афғон халқига тезкор инсонпарварлик ва бошқа ёрдам кўрсатиш масаласида халқаро ҳамжамият саъй-ҳаракатларини бирлаштириш муҳим аҳамият касб этишини билдирган.

Маълумот ўрнида, бугун, 27 октябрь куни Эрон пойтахти Теҳронда Афғонистон бўйича ушбу мамлакатга қўшни бўлган давлатлар Ташқи ишлар вазирларининг учрашуви бўлиб ўтмоқда. Унда Афғонистондаги ҳарбий-сиёсий вазиятни ривожлантириш истиқболлари ва инклюзив ҳукуматни шакллантириш масалалари муҳокама қилинади. Шунингдек, гуманитар масалалар, оғир вазият муносабати билан афғон халқига ёрдам кўрсатиш ҳам кун тартибидан ўрин олган. Тадбирда Эрон ва Ўзбекистондан ташқари, яна Россия Федерацияси, Хитой, Покистон, Тожикистон ва Туркманистон вакиллари иштирок этмоқда.