“Коля Қирғиз”нинг тансоқчиси “Узун Улан” Россияда ушланди

Қирғизистонлик марҳум криминал авторитет Қамчибек Кўлбоев (Қамчибек Асанбек)нинг тансоқчиси Улан Барчакеев Москва шаҳрида қўлга олинди. Бу ҳақда бугун, 4 сентябрь куни Қирғизистон Ички ишлар вазирлиги хабар берди.

53 ёшли Барчакеев жиноят оламида “Узун Улан” лақаби билан танилган. Вазирликка кўра, у Қамчибек Кўлбоевнинг яқин ва ишончли одами бўлган ва унинг шахсий хавфсизлиги учун жавобгар бўлган.

“Узун Улан” 2019 йилда Бишкекда содир этилган талончилик ҳужумида айбланмоқда. Кейин у чет эллик тадбиркордан жуда катта мулкни тортиб олган. Барчакеев айни пайтда Москвадан Бишкекга олиб келинган.

Барчакеевга уюшган жиноий гуруҳнинг фаол аъзоси сифатида ИИВ томонидан тезкор тергов ҳаракатлари олиб борилмоқда.

“Бир неча бор жиноий иш юритишда иштирок этган, шунингдек, пул ундириш билан шуғулланган ва тадбиркорлардан тижорат фирмалари ҳамда кўчмас мулкларни тортиб олган”, дейилади хабарда.

Маълумот учун, Қамчибек Асанбек Қирғизистон ва МДҲдаги энг нуфузли “ворзакон”лардан бири бўлган. Тахаллуси – “Коля Қирғиз”. У наркотик бизнеси, қурол-яроғ савдоси, товламачилик, қора кўчмас мулк, талончилик, автомашина ўғирлаш, бандитизм, пул ювиш, давлат мулкини ўғирлаш ва буюртма асосида қотиллик қилиш билан шуғулланган. У Қирғизистондаги миллионерлардан бири эди.

Қайд этиш жоиз, 2020 йилдан бери Қирғизистон Миллий хавфсизлик давлат қўмитаси криминал авторитетни бир неча бор ҳибсга олган. 2023 йилнинг августида Қамчибек Кўлбоевга нисбатан жиноят иши даъво муддати ўтгани сабабли тугатилган. Криминал авторитет Қамчибек Асанбек Қозоғистонда трансмиллий жиноий ташкилот тузишда гумон қилинган. У 2023 йилнинг октябрь ойида Бишкекда ўлдирилди.

Эслатиб ўтамиз, жорий йилнинг 27 июнь куни криминал авторитет Қамчибек Кўлбоев (Қамчибек Асанбек) жиноий гуруҳини молиялаш билан шуғулланган “Барон” наркокартел раҳбари ва унинг 3 нафар аъзоси Қирғизистонда қўлга олинганди.