“Kolya Qirg‘iz”ga aloqador 50 ga yaqin bojxona xodimi ishdan olindi

Qirg‘iziston bojxona xizmatining 50 ga yaqin xodimi mahalliy jinoiy avtoritet Qamchi Ko‘lboyevga aloqadorligi tufayli ishdan bo‘shatildi. Bu haqda Qirg‘iziston Milliy xavfsizlik davlat qo‘mitasi matbuot markazi xabar berdi.

Ma’lum qilinishicha, Qirg‘iziston bojxona xizmatida maxsus tekshiruv o‘tkazilib, tizimda “Kolya Qirg‘iz” va mamlakat raisining sobiq o‘rinbosari Raiybek Matraimovga aloqador bo‘lgan shaxslar borligi aniqlangan. 

“Milliy xavfsizlik davlat qo‘mitasi tomonidan davlat organlari va idoralaridagi nopok xodimlarni aniqlash va ularga chek qo‘yish ishlari davom ettiriladi. Yuqoridagi huquqbuzarliklarga aloqador boshqa xodimlar ham tekshirilmoqda”, deyiladi xabarda.

Eslatib o‘tamiz, joriy yilning 4 oktyabr kuni qirg‘izistonlik kriminal avtoritet Qamchibek Ko‘lboyev (“Kolya Qirg‘iz”) Bishkekda qo‘lga olinayotganda mamlakat Milliy xavfsizlik xodimlari tomonidan otib o‘ldirilgandi. Shundan so‘ng, Qirg‘iziston Milliy xavfsizlik davlat qo‘mitasi rahbari Qamchibek Tashiyev To‘qmoq shahrida qo‘mitaning yangi binosi ochilishida qatnashib, jinoyatchilarga qarata “bittasi bosh ko‘tarsa, o‘sha boshni chopishi”ni aytgandi. Yevroosiyo tahliliy klubi rahbari, xalqaro siyosatshunos Nikita Mendkovich esa Qamchibek Tashiyev Qirg‘izistonning navbatdagi prezidenti bo‘lishi mumkinligini prognoz qildi.