Миллий хавфсизлик раҳбари Қирғизистоннинг кейинги президенти бўлиши мумкин – эксперт

Евроосиё таҳлилий клуби раҳбари, халқаро сиёсатшунос Никита Мендковичнинг фикрича, Миллий хавфсизлик давлат қўмитаси раҳбари Қамчибек Ташиев Қирғизистоннинг навбатдаги президенти бўлиши мумкин. Бу ҳақда у ўзининг Telegram-каналида ёзган.

“[Қамчибек] Кўлбоев (Коля Қирғиз) ўлдирилганидан кейин у [Қирғизистон Президенти Садир Жапаров] тезда сиёсий таъсирини йўқотмоқда ва у ўз лавозимини эрта тарк этиши мумкин. Кейинги президент бўлиш имконияти бор Бош вазир ўринбосари, Миллий хавфсизлик давлат қўмитаси раҳбари Қамчибек Ташиев кучайиб бормоқда. Агар Жапаров вазият устидан назоратни тикламаса ва ўзига янги кучли таянч ҳосил қилмаса, биз Ташиевнинг келажакдаги режалари ва йўналиши ҳақида ўйлашимиз керак”, деб ёзади Никита Мендкович.

Экспертнинг фикрича, Кўлбоэвнинг ўлдирилиши Ташиев ва унинг бўлимига катта куч ва ресурслар ўтганини англатади. 

“Ташиев тобора кўпроқ кадрлар, иқтисодий ва ҳатто ҳаёт ва ўлимга оид қарорлар қабул қила бошлайди”, дейди Мендкович.

Унинг прогнозига кўра, ё Ташиев Жапаровнинг амалда давомчисига айланади ёки Жапаров Ташиевдан “мувозанатга солувчи” янги сиёсий таянч яратади.

Маълумот учун, жорий йилнинг 4 октябрь куни Бишкекда ўтказилган махсус операция давомида қонундаги ўғри Қамчи Кўлбоев йўқ қилинган. Миллий хавфсизлик давлат қўмитаси матбуот маркази қуролли қаршилик кўрсатган уюшган жиноий гуруҳ раҳбари қўлга олингани ва ўлдирилгани ҳақида хабар берган. Қонун ўғрининг йўқ қилиниши билан Қирғизистонда тозалаш бошланди. Тергов маълумотларига кўра, Қамчи Кўлбоевнинг жиноий фаолиятига алоқадор ёки унга ҳомийлик қилган ўнлаб одамлар ҳибсга олинган.

Умуман олганда, Миллий хавфсизлик давлат қўмитасининг расмий маълумотларига кўра, давом этаётган тергов ҳаракатлари давомида уюшган жиноий гуруҳнинг 40 дан ортиқ фаол аъзолари ва етакчилари қўлга олинган.