Колумбияда ўнг қанотчи номзод президентлик сайловида ғалаба қозонди

Колумбияда ўтказилган президентлик сайловининг иккинчи босқичида ўнг қанотдан номзод Абелардо де ла Эсприелла кичик фарқ билан ғалаба қозонди. Бу ҳақда “Reuters” хабар берди.

Дастлабки натижаларга кўра, АҚШ Президенти Дональд Трамп қўллаб-қувватлаган номзод овозларнинг 49,66 фоизини қўлга киритган. Унинг рақиби, сенатор Иван Сепеда эса 48,70 фоиз овоз тўплаган. Икки номзод ўртасидаги фарқ тахминан 250 минг овозни ташкил этган.

Қайд этилишича, сайлов кампанияси давомида Де ла Эсприелла жиноятчиликка қарши кескин кураш, иқтисодиётни жонлантириш, нефть ва газ соҳасини ривожлантириш, солиқларни ҳамда давлат аппаратини қисқартиришни ваъда қилган. У шу билан бирга амалдаги Президент Густаво Петро даврида жорий этилган энг кам иш ҳақининг 23 фоизлик оширилиши ва айрим ижтимоий дастурларни сақлаб қолишини билдирган.

“Мен менга овоз берганлар учун ҳам, бошқа номзодни танлаганлар учун ҳам президент бўламан”, деган Де ла Эсприелла ўз тарафдорлари олдида қилган чиқишида.

Унинг рақиби Иван Сепеда эса Президент Густаво Петронинг сиёсатини давом эттиришни таклиф қилган. Булар қаторида кам таъминланган аҳоли учун пенсия тўловлари, касаба уюшмалари қўллаб-қувватлаган меҳнат ислоҳотлари, янги нефть лойиҳаларига мораторий ва қуролли гуруҳлар билан тинчлик музокараларини давом эттириш бор эди.

Маълумотларга кўра, Сепеда сайлов натижалари бўйича якуний текширувни кутишини маълум қилган. Унинг штаби мамлакат бўйлаб 33 минг сайлов қутиси бўйича натижаларни баҳслашмоқда.

Таҳлилчилар фикрича, номзодлар ўртасидаги фарқ жуда кичик бўлгани сабабли янги президент ўз дастурининг бир қисмини юмшатишга мажбур бўлиши мумкин. Чунки мамлакат парламентида ҳеч бир сиёсий куч мутлақ кўпчилик тарафдорларига эга эмас. Сайловда 41,4 миллион сайловчидан 26,3 миллиони иштирок этган. Шунингдек, 427 мингдан ортиқ сайловчи бўш бюллетень ташлаб, норозилик овозини билдирган.

Кузатувчиларнинг қайд этишича, Колумбиядаги сайлов натижалари Лотин Америкасида сўнгги йилларда кузатилаётган сиёсий тенденцияни давом эттирган. Бунгача Чили, Аргентина, Коста-Рика, Боливия ва Эквадорда ҳам ўнг қанотчи президентлар сайланган эди.

Эслатиб ўтамиз, аввалроқ Колумбия Президенти Густаво Петро АҚШ Президенти Дональд Трампни мамлакатдаги президентлик сайловларига аралашишда айблаган эди.