Колумбия Президенти Трампга қарши урушга тайёрлигини айтди

Колумбия Президенти Густаво Петро ўз давлатини ҳимоя қилиш учун қурол олишга тайёрлигини билдирди. Шунингдек, АҚШ уни ҳибсга олишга уринадиган бўлса, халқи унинг ёнида туришига ишонишини айтган. Бу ҳақда Колумбия етакчиси ўзининг Х саҳифасида ёзиб қолдирди. 

Петронинг ёзишича, у ҳеч қачон ҳарбий бўлмаган, лекин уруш ва яширин кураш нима эканидан хабари бор. 

“1989 йилги тинчлик келишувидан сўнг қуролни қўлимга олмайман, деб қасамёд қилгандим, лекин ватан учун бу ишни қилишга мажбурман, гарчи урушни ёқтирмасам ҳам”, дейди у. 

Қайд этилишича, Петро бу баёнотни АҚШ тўсатдан Венесуэла Президенти Николас Мадурони ҳибсга олганидан кейин берган.

“Агар улар Президентни ҳибсга олишга уринсалар ва буни уддасидан чиқсалар, халқим ўз етакчисини севиб ва ҳурмат қиладиган бўлса, миллат ягуарини озод қилади”, дейди Петро ўз постида. 

Колумбия раҳбари шунингдек, полиция разведкаси хизматидаги бир нечта полковникларни давлатга зарар етказувчи нотўғри маълумот тарқатганликлари сабабли лавозимидан четлатишга буйруқ берганини маълум қилган. 

Маълумот учун, Густаво Петро ёшлигида чап радикал “19-апрель ҳаракати” (М-19) аъзоси бўлган.

Аввалроқ, АҚШ кутилмаган ҳарбий операция ўтказиб, Венесуэлага зарба берган ва Мадурони ҳибсга олган эди. Дональд Трамп Мадурони “наркотерроризм”да айбламоқда. Шунингдек, 2025 йил декабрь ойида Трамп Венесуэланинг олдинги раҳбарияти томонидан ўзлаштирилган нефть ҳуқуқларини қайтаришга интилаётганини айтган.

Нодир Шукуров