Клублар ўртасидаги Жаҳон чемпионатининг яна бир иштирокчиси аниқ бўлди

Европа Чемпионлар лигасининг кечаги натижаларига кўра, 2025 йилги клублар ўртасидаги Жаҳон чемпионатининг яна бир иштирокчиси маълум бўлди. Туриннинг “Ювентус” клуби ЖЧда иштирок этади.

“Наполи” “Барселона”га мағлуб бўлганидан сўнг, айнан Турин клуби сўнгги 4 йил ичида UEFA рейтингида энг юқори кўрсаткичга эга бўлган Италия жамоаси сифатида турнир иштирокчилари қаторига киритилди.

“Ювентус”дан ташқари, А Сериядан “Интер” ҳам Италия шарафини ҳимоя қилади. Клублар ўртасидаги Жаҳон чемпионатининг бошқа 8 та иштирокчиси аллақачон маълум бўлиб улгурган: “Реал Мадрид”, “Манчестер Сити”, “Челси”, “Бавария”,ПСЖ, “Боруссия Дортмунд”, “Порту” ва “Бенфика”.

Ҳозирга келиб ЖЧда қатнашувчи Европадан фақат 2 та жамоа аниқланиши керак. Айни вақтда Европа Чемпионлар лигаси ғолиби ва UEFA рейтингида энг юқори натижага эга бўлган Испания жамоаларидан “Атлетико Мадрид” ёки “Барселона” клублар ўртасидаги Жаҳон чемпионатига йўл олади. Агар Чемпионлар лигасини турнирда иштирок этишини кафолатлаган клуб ютса, Европада сўнгги ўрин энг юқори рейтингига эга клубга насиб этади.

Маълумот учун, 2025 йилнинг ёзида клублар ўртасидаги Жаҳон чемпионати илк бор янги форматда бўлиб ўтади. Мусобақада бутун дунёдан 32 та энг яхши жамоа қатнашади..

Жанубий Америкадан учта иштирокчи аллақачон маълум: “Фламенго”, “Палмейрас” ва “Флуминенсе”. Яна учта клуб тез орада аниқ бўлади.

Осиёдан Саудиянинг “Ал-Ҳилол” ва Япониянинг “Урава Редс” жамоалари иштирок этади. Мусобақада Осиё Чемпионлар лигасининг жорий мавсуми ғолиби ва сўнгги 4 йил ичида энг яхши натижа қайд этган жамоа ҳам қатнашади.

Африкадан 4 нафар иштирокчи қатнашади. “Ал-Аҳли Қоҳира” ва “Видад Касабланка” ЖЧда тўп тепиши аниқ бўлиб улгурган. “Монтеррей, “Сиэтл” ва “Леон” КОНКАКАФ вакиллари сифатида ЖЧда ўйинларида кураш олиб боради.

OFC зонасидан Янги Зеландиянинг “Окленд Сити” жамоаси турнирда ўз омадини синаб кўради. Мусобақа мезбони АҚШ томонидан Жаҳон чемпионатига 1 та жамоа жалб қилинади.

2025 йилги клублар ўртасидаги Жаҳон чемпионати 15 июндан 13 июлгача бўлиб ўтади.