КХДРда илк бор компьютер ўйинлари учун клуб пайдо бўлди

Шимолий Корея пойтахт Пхеньяндаги Хвасон туманида жойлашган янги осмонўпар бинода ўйин ўйнаш учун мўлжалланган биринчи компьютер клубини очишга ҳозирлик кўрилмоқда. Расмий ишга туширишдан олдин мазкур муассасани мамлакат етакчиси Ким Чен Ин кўздан кечирган. Бу ҳақда NK News хабар берди.

Маълум қилинишича, клуб 300 нафар ўйинчига мўлжалланган бўлиб, пойтахт ва умуман мамлакат фуқароларининг моддий ва маданий фаровонлигини оширишга хизмат қилиши керак. Эълон қилинган суратларда компьютер клубида ҳозирча компьютерлар ва мониторлар йўқлиги кўринади. Бироқ клубда кўплаб бильярд столлари ва ўйин учун мўлжалланган компьютер креслолари мавжуд.

Манбага кўра, КХДР ҳукумати ўйин материалларининг мазмунини қатъий назорат қилади. Ўйинчиларга хорижий ўйинларнинг сиёсий режимга таҳдид солувчи сюжетларини чиқариб ташлаган модификацияланган версиялари таклиф қилиниши мумкин. Лойиҳанинг мамлакатда дам олиш инфратузилмасини кенгайтириш дастури доирасига киритилиши кутилмоқда.

КХДРдаги биринчи компьютер клубида қандай ускуналар ишлатилиши ва уларнинг етказиб берилиши қачон амалга оширилиши ҳозирча номаълум. Эҳтимол, Шимолий Корея зарур қисмларни санкцияларни четлаб ўтган ҳолда олиб кириш йўлларини излаши зарур бўлади.