Киев Россиянинг баллистик ракеталари ҳужумига учради (видео)

Россия бугун, 11 июль куни эрталаб Украина пойтахти Киевга баллистик ракеталар билан ҳужум қилди. Бу ҳақда маҳаллий расмийлар маълум қилди.

Маълумотларга кўра, шаҳарда ҳаво тревогаси эълон қилинишидан аввал бир қатор кучли портлашлар содир бўлган.

Киев шаҳар ҳарбий маъмуриятининг Telegram орқали маълум қилишича, ҳужум оқибатида шаҳарнинг бир туманидаги турар жой бўлмаган бино шикастланган. Яна бир туманда тутун кўтарилган, шунингдек, зарба натижасида офис биноларидан бирига ўт кетган.

Эслатиб ўтамиз, Россиянинг мазкур амалга оширган ракета ҳужуми Киевга сўнгги бир ҳафта ичида қилинган тўртинчи баллистик ракета ҳужуми бўлди. Бундан аввал, Россия 6 июль куни Киев вилоятидаги Вишневе шаҳрида жойлашган ўқ-дори омборига баллистик ракета билан зарба берган эди. Украина Президенти Владимир Зеленский кейинроқ ушбу омбор нишонга олинганини тасдиқлаган ва ҳужум оқибатида 10 киши ҳалок бўлганини айтганди..

Шундан сўнг ҳафта давомида Киев яна икки марта баллистик ракета ҳужумига учради. Украина расмийлари 8 июль кунги зарбани пойтахтга бир ҳафтадан кам вақт ичидаги учинчи баллистик ҳужум сифатида баҳолаган.