Ким Россияга сапёр ва қурувчиларни юбормоқчи

Шимолий Корея Россияга 1000 нафар сапёр ва 5000 қурувчини юборишини ваъда қилди. Бу ҳақда Россия Федерациясининг Хавфсизлик кенгаши котиби Сергей Шойгу маълум қилди.

Билдирилишича, КХДР Украина Қуролли кучлари бўлинмалари Россия армияси томонидан сиқиб чиқарилганидан кейин катта зарар кўрган Курск вилоятини тиклашда иштирок этиш учун Россияга 6000 нафар мутахассис юборади. Россия ва Шимолий Корея ўртасидаги ушбу келишув бугун, 17 июнь куни Шойгунинг бир ой ичидаги КХДРга иккинчи сафарида эришилди.

“КХДР Давлат ишлари раиси Ким Чен Ин Россияга минг нафар сапёрни Россия ҳудудида миналарни тозалаш учун, шунингдек, беш минг ҳарбий қурувчини вайрон қилинган инфратузилма объектларини тиклаш учун юбориш қарорини қабул қилди”, деди Шойгу.

Унинг айтишича, томонлар Курск вилоятидаги жангларда ҳалок бўлган шимолий кореялик ҳарбийлар хотирасига ёдгорликлар барпо этиш масаласида ҳам келишиб олган. Шойгунинг маълум қилишича, Пхеньянда Россия иштирокида тегишли ёдгорлик мажмуаси ва музей яратиш масаласи муҳокама қилинган.

Маълумот учун, Шойгу Шимолий Кореяга бугун, 17 июнь куни Россия Президенти Владимир Путин топшириғига биноан ташриф буюрган. Бу ташриф жорий йилнинг 4 июнь куни бўлиб ўтган олдинги сафар давомида эришилган келишувларни амалга ошириш доирасида ташкил этилган.

Ўшанда Шойгу Ким Чен Ин билан Украина фронтидаги вазият, 2024 йил июнида имзоланган ҳар томонлама стратегик шериклик битимининг айрим бандлари бажарилиши ва Курск вилоятида жанг қилган кореялик жангчилар хотирасини сақлаш масалаларини муҳокама қилган.

Қайд этиш жоиз, Россия расмийлари КХДР қўшинларининг Украина Қуролли кучларига қарши жанглардаги иштирокини жорий йил апрель ойи охирида тан олди. Бош штаб раҳбари Валерий Герасимов Курск вилояти “тўлиқ озод қилингани”ни эълон қилган ва шимолий кореялик жангчилар “минтақага кириб келган Украина кучларини тор-мор қилишда муҳим ёрдам берганини” таъкидлаган эди. Шундан сўнг Путин Ким Чен Ин ва КХДР раҳбариятига ёрдам учун миннатдорлик билдирган эди.

Россия билан Шимолий Корея ўртасидаги стратегик иттифоқ чуқурлашуви 2024 йил ёзида Путиннинг КХДРга ташрифидан сўнг бошланди. Ўшанда икки давлат раҳбарлари агар улардан бирига агрессия қилинса, ўзаро ҳарбий ёрдам кўрсатишни назарда тутувчи стратегик шериклик шартномасини имзолаган.