Ким Россия армиясида хизмат қилган аскарларни тақдирлади

Шимолий Корея раҳбари Ким Чен Ин Курск вилоятида ҳарбий амалиётларда қатнашган Шимолий Корея халқ армияси аскар ва қўмондонларини мукофотлаш маросимида иштирок этди. Бу ҳақда Шимолий Кореянинг Марказий давлат ахборот агентлиги хабар берди.

Тадбир Пхеньянда, Корея Меҳнат партияси Марказий Қўмитаси қароргоҳида бўлиб ўтган. 

Ким Чен Ин нутқида хориждаги ҳарбий операцияда қатнашганларни “тарихга муҳрланадиган буюк қаҳрамонликларни амалга оширди” деб таъкидлаган. 

Унинг сўзларига кўра, Корея халқ армияси жангчилари мамлакатнинг мавжудлиги ва тараққиёти учун мустаҳкам кафолат яратган. У, шунингдек, КХДР Қуролли кучлари бутун дунё эътиборини тортгани ва “халқ армиясининг қудратини исботлаганини” қайд этган. 

Давлат раҳбарининг таъкидлашича, хориждаги ҳарбий амалиётнинг муваффақиятли якунланишидаги асосий омил – халқ оммавий қаҳрамонлиги бўлган.

Хабарга кўра, маросимда аскар ва қўмондонларга КХДРнинг энг юқори давлат мукофотлари, жумладан, “КХДР Қаҳрамони” унвонлари топширилган.

Маълумот учун, 2024 йилнинг 19 июнь куни Россия Президенти Владимир Путиннинг Пхеньянга ташрифи чоғида мамлакатлар стратегик ҳамкорлик тўғрисидаги битимни имзолаганди. Унга кўра, мамлакатлардан бирига ҳужум қилинган тақдирда улар бир-бирига ҳарбий ёрдам кўрсатишга мажбур.

Эслатиб ўтамиз, аввалроқ Ким Чен Ин Россиянинг Курск вилоятида Украина Қуролли кучларига қарши ҳарбий амалиётларда қатнашган ва давлат мукофотларини олиш учун уйига қайтган Корея халқ армиясининг хориждаги оператив кучларининг етакчи қўмондонларини қабул қилганди.