Ким Чен Иннинг синглиси эҳтимолий уруш сабабини айтди

Корея яримороли ва минтақадаги кучлар тенглигининг бузилиши дарҳол уруш бошланишини англатади. Шунинг учун, КХДРнинг ядро кучларини мустаҳкамлаш йўналиши ягона тўғри танлов. Бу ҳақда КХДР Меҳнат партияси Марказий қўмитаси бўлими раҳбари ўринбосари ва мамлакат етакчиси Ким Чен Иннинг синглиси Ким Ё Чжон маълум қилди.

“Бугун Корея яримороли ва минтақадаги кучлар тенглигининг бузилиши – бу дарҳол уруш бошланишини англатади. Бу объектив ҳақиқат, уни инкор этиб бўлмайди”, деди Ким Ё Чжон.

У, шунингдек, аввалроқ Жанубий Корея, Япония ва АҚШ томонидан ўтказилган “Freedom Edge” машғулотларини, Корея ярим оролида ядро уруши бўйича кенг қамровли операцияга тақлид қилувчи “Iron Mace” машғулотларини ва бошқа машғулотларни ҳам қайд этган. Унга кўра, ўтган йилда КХДРга қаратилган 100 дан ортиқ машғулотлар ўтказилган.

“Шундай хавфли ҳарбий машғулотлар сонининг сезиларли даражада ошиши нафақат давлатимиз, балки минтақа учун ҳам жиддий таҳдидга айланди”, деди у.

Унинг сўзларига кўра, “душманларнинг ҳарбий истерияси кучайиши” КХДРнинг ўз ҳарбий қудратини ривожлантириш йўналишининг тўғрилигини ва долзарблигини аниқроқ кўрсатмоқда.

Эслатиб ўтамиз, аввалроқ Шимолий Корея Шарқий денгиз томон бир нечта қисқа масофали баллистик ракеталарни учирган эди. Маълум бўлишича, ракеталар 250 миля масофани босиб ўтган, бироқ уларнинг қанчаси ҳавога отилганига аниқлик киритилмаган. Япония Бош вазири Сигэру Исиба эса улар мамлакатнинг эксклюзив иқтисодий зонаси ташқарисидаги ерларга қўнгани ва ҳозирча зарар ҳақида хабар йўқлигини айтган.