Kim Chen In Xitoyga qanday sayohat qilyapti?

Shimoliy Koreya rahbari Kim Chen In bugun, 2 sentyabr kuni Pekinga o‘zining mashhur yashil zirhlangan poyezdida yetib keldi. Bu poyezdi orqali u mamlakat rahbarlari o‘nlab yillardan beri qo‘llab kelayotgan, xavfsiz va maxsus transport turidan foydalanadi.

Shimoliy Koreyaning eski yo‘lovchi samolyotlari bilan taqqoslaganda, o‘q o‘tmas poyezdlar xavfsizroq va qulayroq hisoblanadi. Ular katta delegatsiya, xavfsizlik xodimlari, ovqat va turli sharoitlar uchun joy yaratadi hamda uchrashuvlardan oldin kun tartibi muhokama qilinadigan maskan bo‘lib xizmat qiladi.

2011 yil oxirida Shimoliy Koreya rahbari bo‘lganidan beri Kim poyezdda Xitoy, Vetnam va Rossiyaga tashrif buyurgan.

Poyezd ichida nima bor?

Yillar davomida Shimoliy Koreya rahbarlari necha bor poyezddan foydalangani aniq emas, ammo Janubiy koreyalik transport eksperti An Byon-min xavfsizlik sabablari bilan bir nechta poyezd ishlatilishini aytgan.

Uning so‘zlariga ko‘ra, poyezdlarda 10–15 ta vagon bo‘lib, ayrimlari faqat rahbar uchun (masalan, yotoqxona), boshqalari esa qo‘riqchilar va tibbiyot xodimlari uchun xizmat qiladi. Poyezdda, shuningdek, ishxona, aloqa uskunalari, restoran va zirhlangan ikki “Mersedes” uchun vagon ham mavjud.

Davlat OAVi bugun Kimni yuqori amaldorlar bilan yashil vagon yonida sigareta chekayotgan holda, shuningdek, katta oltin ramz va Shimoliy Koreya bayrog‘i qo‘yilgan yog‘och panelli ishxonasida o‘tirgan holda ko‘rsatdi. Uning stolida oltin yozuvli noutbuk, bir nechta telefon, sigaretalar qutisi va turli idishlardagi ko‘k va shaffof suyuqliklar turgan. Oynalari ko‘k-oltin pardalar bilan to‘silgan.

2018 yilda davlat televideniyesi chiqargan videoda Kim Xitoy amaldorlari bilan poyezdning keng va kulrang divanlar qo‘yilgan vagonida uchrashgani ko‘rsatilgan. 

2020 yilda tayfundan jabr ko‘rgan hududga safar vaqtida poyezd ichida gul shaklidagi yoritgichlar va “zebra” naqshli kreslolar ko‘rsatilgan edi.

Rusiyalik amaldor Konstantin Pulikovskiyning 2002 yilda chiqqan “Orient Express” kitobida Kim Chen Ir (Kim Chen Inning otasi va o‘sha paytdagi rahbar)ning poyezd orqali Moskvaga qilgan uch haftalik sayohati haqida yozilgan. Unga ko‘ra, poyezdga Parijdan “Bordo” va “Bojole” sharoblari hamda tirik omarlar havo orqali yetkazib berilgan.

Qanday qilib chegaradan o‘tadi?

Kim Chen In poyezdda Rossiyaga borganda, shu jumladan 2023 yilda Putin bilan sammit uchun, poyezd g‘ildiraklari chegara bekatida qayta moslashtirilgan – chunki ikki mamlakatda temir yo‘l kengligi turlicha.

Xitoyga borarda esa bunday zarurat yo‘q, ammo poyezd chegaradan o‘tgandan so‘ng uni xitoylik mashinist boshqaradi, chunki mahalliy temiryo‘l tizimi va signallarni u yaxshi biladi.

Kim Si Szinpin bilan oldingi sammitlarga safar qilganda uning maxsus poyezdlari Xitoyda ishlab chiqarilgan yashil DF11Z lokomotivlari tomonidan tortib borilgan. Ularning seriya raqamlari 0001 va 0002 bo‘lib, bu lokomotivlar faqat yuqori amaldorlar uchun ajratilgani ko‘rsatilgan.

Bugun Pekin vokzaliga 0003 raqamli DF11Z lokomotivi 20 dan ortiq vagon tortib kirgan. Vagonlarda Shimoliy Koreya bayrog‘i va rasmiy ramzi oltin rangda bo‘lgan.

Poyezdga Xitoyning sariq chiziqli o‘nlab vagonlari ham qo‘shilgan, ularda ehtimol Kimni chegarada kutib olgan xitoylik amaldorlar bo‘lgan.

2019 yilda Donald Tramp bilan Vetnamda sammitga ketayotganda Kimning poyezdi qizil-sariq lokomotiv tomonidan tortib borilgan. 

Poyezd Xitoy temiryo‘llarida soatiga 80 km tezlikda harakatlana oladi, Shimoliy Koreya bo‘ylab esa soatiga taxminan 45 km bilan cheklanadi.

Poyezddan kimlar foydalangan?

Shimoliy Koreya asoschisi, Kim Chen Inning bobosi Kim Ir Sen 1994 yilda vafot etguncha poyezd orqali xorijga tez-tez safar qilgan.

Kim Chen Ir poyezddan foydalanib, 2001 yilda 20 ming km masofaga Moskvaga borgan. U 2011 yil oxirida poyezdda safar paytida yurak xurujidan vafot etgan, uning vagonlari hozir mavzoleyda namoyish etilmoqda.

Poyezd Kimlar sulolasi targ‘ibotida ham muhim o‘rin tutgan. Ular poyezd orqali butun mamlakat bo‘ylab oddiy odamlar bilan uchrashib, uzoq safarlarni amalga oshirgani ko‘rsatib kelingan.

2022 yilda davlat televideniyesi Kim Chen Inning mamlakat bo‘ylab “to‘liq poyezd turi”ni ko‘rsatib, u yerda jo‘xori dalalari inspeksiyasi va “kommunistik utopiya” g‘oyasini targ‘ib qilganini e’lon qilgan.