Ким Чен Ин Хитойга қандай саёҳат қиляпти?

Шимолий Корея раҳбари Ким Чен Ин бугун, 2 сентябрь куни Пекинга ўзининг машҳур яшил зирҳланган поездида етиб келди. Бу поезди орқали у мамлакат раҳбарлари ўнлаб йиллардан бери қўллаб келаётган, хавфсиз ва махсус транспорт туридан фойдаланади.

Шимолий Кореянинг эски йўловчи самолётлари билан таққослаганда, ўқ ўтмас поездлар хавфсизроқ ва қулайроқ ҳисобланади. Улар катта делегация, хавфсизлик ходимлари, овқат ва турли шароитлар учун жой яратади ҳамда учрашувлардан олдин кун тартиби муҳокама қилинадиган маскан бўлиб хизмат қилади.

2011 йил охирида Шимолий Корея раҳбари бўлганидан бери Ким поездда Хитой, Вьетнам ва Россияга ташриф буюрган.

Поезд ичида нима бор?

Йиллар давомида Шимолий Корея раҳбарлари неча бор поезддан фойдалангани аниқ эмас, аммо Жанубий кореялик транспорт эксперти Ан Бён-мин хавфсизлик сабаблари билан бир нечта поезд ишлатилишини айтган.

Унинг сўзларига кўра, поездларда 10–15 та вагон бўлиб, айримлари фақат раҳбар учун (масалан, ётоқхона), бошқалари эса қўриқчилар ва тиббиёт ходимлари учун хизмат қилади. Поездда, шунингдек, ишхона, алоқа ускуналари, ресторан ва зирҳланган икки “Мерседес” учун вагон ҳам мавжуд.

Давлат ОАВи бугун Кимни юқори амалдорлар билан яшил вагон ёнида сигарета чекаётган ҳолда, шунингдек, катта олтин рамз ва Шимолий Корея байроғи қўйилган ёғоч панелли ишхонасида ўтирган ҳолда кўрсатди. Унинг столида олтин ёзувли ноутбук, бир нечта телефон, сигареталар қутиси ва турли идишлардаги кўк ва шаффоф суюқликлар турган. Ойналари кўк-олтин пардалар билан тўсилган.

2018 йилда давлат телевидениеси чиқарган видеода Ким Хитой амалдорлари билан поезднинг кенг ва кулранг диванлар қўйилган вагонида учрашгани кўрсатилган. 

2020 йилда тайфундан жабр кўрган ҳудудга сафар вақтида поезд ичида гул шаклидаги ёритгичлар ва “зебра” нақшли креслолар кўрсатилган эди.

Русиялик амалдор Константин Пуликовскийнинг 2002 йилда чиққан “Orient Express” китобида Ким Чен Ир (Ким Чен Иннинг отаси ва ўша пайтдаги раҳбар)нинг поезд орқали Москвага қилган уч ҳафталик саёҳати ҳақида ёзилган. Унга кўра, поездга Париждан “Бордо” ва “Божоле” шароблари ҳамда тирик омарлар ҳаво орқали етказиб берилган.

Қандай қилиб чегарадан ўтади?

Ким Чен Ин поездда Россияга борганда, шу жумладан 2023 йилда Путин билан саммит учун, поезд ғилдираклари чегара бекатида қайта мослаштирилган – чунки икки мамлакатда темир йўл кенглиги турлича.

Хитойга борарда эса бундай зарурат йўқ, аммо поезд чегарадан ўтгандан сўнг уни хитойлик машинист бошқаради, чунки маҳаллий темирйўл тизими ва сигналларни у яхши билади.

Ким Си Цзиньпин билан олдинги саммитларга сафар қилганда унинг махсус поездлари Хитойда ишлаб чиқарилган яшил DF11Z локомотивлари томонидан тортиб борилган. Уларнинг серия рақамлари 0001 ва 0002 бўлиб, бу локомотивлар фақат юқори амалдорлар учун ажратилгани кўрсатилган.

Бугун Пекин вокзалига 0003 рақамли DF11Z локомотиви 20 дан ортиқ вагон тортиб кирган. Вагонларда Шимолий Корея байроғи ва расмий рамзи олтин рангда бўлган.

Поездга Хитойнинг сариқ чизиқли ўнлаб вагонлари ҳам қўшилган, уларда эҳтимол Кимни чегарада кутиб олган хитойлик амалдорлар бўлган.

2019 йилда Дональд Трамп билан Вьетнамда саммитга кетаётганда Кимнинг поезди қизил-сариқ локомотив томонидан тортиб борилган. 

Поезд Хитой темирйўлларида соатига 80 км тезликда ҳаракатлана олади, Шимолий Корея бўйлаб эса соатига тахминан 45 км билан чекланади.

Поезддан кимлар фойдаланган?

Шимолий Корея асосчиси, Ким Чен Иннинг бобоси Ким Ир Сен 1994 йилда вафот этгунча поезд орқали хорижга тез-тез сафар қилган.

Ким Чен Ир поезддан фойдаланиб, 2001 йилда 20 минг км масофага Москвага борган. У 2011 йил охирида поездда сафар пайтида юрак хуружидан вафот этган, унинг вагонлари ҳозир мавзолейда намойиш этилмоқда.

Поезд Кимлар сулоласи тарғиботида ҳам муҳим ўрин тутган. Улар поезд орқали бутун мамлакат бўйлаб оддий одамлар билан учрашиб, узоқ сафарларни амалга оширгани кўрсатиб келинган.

2022 йилда давлат телевидениеси Ким Чен Иннинг мамлакат бўйлаб “тўлиқ поезд тури”ни кўрсатиб, у ерда жўхори далалари инспекцияси ва “коммунистик утопия” ғоясини тарғиб қилганини эълон қилган.