ХЖСга янги таҳдид. Суддан Трампни таъқиб қилмасликка кафолат талаб қилинди

АҚШ Халқаро жиноий судни (ХЖС) юридик шахс сифатида санкциялар орқали жазолаш билан таҳдид қилди. Бу ҳақда “Reuters” хабар берди.

Ҳозирча чекловлар фақат айрим шахсларга нисбатан қўлланмоқда. Вашингтон суди АҚШ Президенти Дональд Трампнинг ваколат муддати тугаганидан кейин унга нисбатан чоралар кўрилишидан хавотирда. Бу нимага асосланиши мумкинлиги очиқланмаган. 

Трамп маъмурияти ХЖСдан унинг асосий ҳужжати – Рим статутига ўзгартириш киритишни талаб қилган. Бу ўзгартириш Трамп ва юқори лавозимли америкалик амалдорларга нисбатан ҳар қандай терговни қатъиян тақиқлаши керак. Агар ХЖС бу ва яна икки талабни бажармаса, (Ғазо секторидаги уруш бўйича Исроил раҳбариятига нисбатан олиб борилаётган терговни тўхтатиш, АҚШ қўшинларининг Афғонистондаги ҳаракатлари бўйича аввал ўтказилган терговни расмий равишда ёпиш) унда санкциялар нафақат суднинг айрим мансабдорларига, балки суднинг ўзига ҳам қўлланиши мумкин.

Жорий йилнинг февраль ойида АҚШ ХЖСга қарши молиявий санкциялар жорий қилганди. Бунга суднинг АҚШ ва унинг иттифоқчиларига, жумладан Исроилга қарши олиб бораётган текширувлари сабаб бўлган.

Ўша ойнинг ўзида АҚШ Россия Президенти Владимир Путинга ва Исроил Бош вазири Биньямин Нетаньяхуга нисбатан ҳибсга олиш ордери чиқарган бош прокурор Карим Хонни ҳам санкциялар рўйхатига киритган. Августда АҚШ ХЖСнинг яна тўрт судьясига қарши санкция қўйган. 

ХЖС Президенти Томоко Аканэ суд АҚШ босимига қарши туришга тайёрлигини айтган. 

Эслатиб ўтамиз, аввалроқ ҳам АҚШ ҳукумати ХЖСни тўлиқ нишонга олиш масаласини кўриб чиқаётгани ҳақида хабар берилганди. АҚШ маъмурияти 2002 йилда ташкил этилган ушбу судни узоқ йиллардан бери танқид қилиб келади. Давлат котиби Марко Рубио уни “миллий хавфсизликка таҳдид” ва “АҚШ ҳамда унинг иттифоқчиси бўлган Исроилга қарши юридик уруш қуроли” деб атаган.