Хусусий секторда ишлаётган ҳомиладор аёлларга 2 млн нафақа берилади

Жамият 6999
image

Жорий йилнинг 1 сентябридан бошлаб хусусий секторда ишлаётган аёлларга давлат бюджетидан 2 миллион сўмлик ҳомиладорлик ва туғиш нафақаси тўлаб берилади. Бу ҳақда Президент Шавкат Мирзиёев кеча, 26 июль куни аҳоли турмушини яхшилаш ва тадбиркорлар фаоллигини оширишга қаратилган таклифлар муҳокамаси юзасидан ўтказган йиғилишда айтиб ўтилган. 

Қайд этилишича, тадбиркорлик бўйича лицензия ва рухсатномаларни расмийлаштириш тартиби соддалаштирилди, муддатлари қисқартирилди. Йил бошидан буён 50 мингдан ортиқ янги тадбиркорлик субъектлари ташкил этилган. Аҳоли сотиб олган уйларнинг 28 фоизи ипотека кредитлари ҳисобига молиялаштирилган.

1 сентябрдан бошлаб хусусий секторда ишлаётган аёлларга ҳам давлат бюджетидан 2 миллион сўмлик ҳомиладорлик ва туғиш нафақаси тўлаб бериш тўғрисидаги қарор қабул қилинган. 

Йиғилишда аҳоли ва бизнесни қийнаб келаётган муаммолар, улар бўйича илгари сурилаётган таклиф ва ташаббуслар муҳокама қилинган. 

Асосли таклифларни қаноатлантириш, одамлар учун қулайликларни ошириш бўйича мутасаддиларга кўрсатмалар берилган.

Эслатиб ўтамиз, Ўзбекистон Президенти 25 июль куни “Ўзбекистон Республикаси аҳолисини ижтимоий ҳимоя қилиш стратегиясини тасдиқлаш тўғрисида”ги фармонни имзолади. Унда 2022 йил 1 сентябрдан бошлаб давлат ижтимоий суғуртаси бўйича минимал истеъмол харажатларидан келиб чиқиб ҳомиладорлик ва туғиш нафақалари тўланиши белгиланди.

Диёра Абдураҳмoнова
Мақолага баҳо беринг
Баҳолаганлар: 174
Рейтинг: 3
t
×