Хорижликлар Ўзбекистонда масофадан туриб бизнес очиши мумкин бўлади

Хорижий IТ-мутахассислар Ўзбекистонда масофадан туриб бизнес очишлари мумкин бўлади. Бу ҳақда бугун, 7 июль куни Президент Шавкат Мирзиёев танишган давлат бошқарувининг ягона интеграциялашган рақамли платформасини жорий этиш, стартаплар экотизимини ривожлантириш ҳамда телекоммуникация соҳасида тадбиркорлик муҳитини яхшилаш юзасидан тақдимотда сўз боради.

Қайд этилишича, тақдимотда АТ соҳаси экспорти ва стартаплар экотизимини ривожлантириш режалари ҳам кўриб чиқилган. 2030 йилгача АТ экспортини 5 миллиард долларга етказиш, 5 мингта фаол стартап ташкил этиш ва 2 миллиард доллар инвестиция жалб қилиш мақсад қилинган.

Халқаро “StartupBlink” рейтингида Ўзбекистон 31 поғона юқорилаб, дунёдаги энг тез ўсаётган стартап экотизим сифатида баҳолангани, Тошкент шаҳри Марказий Осиё шаҳарлари орасида 1-ўринни эгаллагани, Самарқанд ва Фарғона илк бор дунёнинг ТОП-1000 стартап шаҳарлари рейтингига киргани қайд этилган.

Бу борада “Talent Hub” дастури ишга туширилиши белгиланган. У орқали хорижий мутахассислар ва инвесторларга масофадан корхона, банк ҳисобрақами ва халқаро карта очиш имконияти яратилади. IT-Park резидентларининг ходимлари учун солиқ имтиёзларини 2040 йилгача узайтириш, “IT visa” ва “Zero Risk” дастурларини кенгайтириш таклиф қилинган.

Шунингдек, АТ экспортчи корхоналарига ойлик иш ҳақи харажатларининг бир қисмини қоплаб бериш, халқаро сертификатлаш харажатларини компенсация қилиш, хорижий буюртмачилар ва мутахассисларни жалб этиш учун релокация харажатларини қисман қоплаш каби қўллаб-қувватлаш механизмлари кўзда тутилмоқда.

Бухоро ва Фарғонада 20 дан ортиқ акселерация дастурларини ташкил этиш, стартапларни йирик халқаро бозорларга олиб чиқиш бўйича ҳам таклифлар тақдим этилган.