Хорижий тил ўрганувчи ёшларга субсидия берилади

Хорижий тил ўрганишни истаган ёшларга “2+6” дастури билан субсидия берилади. Бу ҳақда ҳукуматнинг кеча, 8 октябрь куни қабул қилинган қарори билан “Ёшларнинг ўқув марказларида хорижий тилларни ўқиш харажатлари бир қисми учун субсидия ажратиш тартиби тўғрисида”ги низом тасдиқланди. 

Низомга кўра, “2+6” дастури белгиланган хорижий тилларни билиш бўйича баллнинг (даражанинг) камида минимал кўрсаткичли сертификатига эга бўлган ариза берувчи ўқув маркази томонидан унга хорижий тилни ўқитиш хизматини кўрсатгани учун дастлабки 2 ой учун ўқиш харажатини ўз ҳисобидан тўлаганда, кейинги 6 ойгача ўқиш харажати учун Ёшлар ишлари агентлигининг Ёшларга оид давлат сиёсатини қўллаб-қувватлаш жамғармасига ажратилган маблағлар доирасида субсидия ажратилишини назарда тутади. 

“2+6” дастурига мувофиқ, ёшларга ҳар ой якуни бўйича қуйидаги миқдорда субсидия ажратилади:

• Тошкент шаҳрида – БҲМнинг 2 бараваригача; 
• Қорақалпоғистон Республикаси ва вилоятлар марказларида – БҲМнинг 1,5 бараваригача; 
• туман (шаҳар)ларда – БҲМнинг 1 бараваригача.

Агентлик томонидан 2025-2026 йилларда ўқув марказларида хорижий тилларни ўрганадиган 20 минг нафаргача, 2031 йилга қадар ҳар йили 20 минг нафаргача ёшларга ўқиш харажатлари учун субсидия ажратилади.

Бунда тегишли йилда субсидия ажратилган ёшлар сони 20 минг нафардан ошган тақдирда, ўша йил учун субсидия ажратиш кейинги йилга қадар тўхтатилади.

Ариза берувчиларнинг хорижий тилни ўқитиш харажати учун:

• ўқув марказларининг рейтингини шакллантириш учун белгиланган тартибда электрон платформа орқали рўйхатдан ўтган;
• ариза берувчиларнинг ўқув машғулотларида қатнашганини  кунлик электрон назорат қилиш имконини берувчи электрон платформага интеграция қилинган ўқув марказларига “2+6” дастури доирасида субсидия ажратилади.

Эслатиб ўтамиз, аввалроқ Ўзбекистонда I ва II гуруҳ ногиронлиги бўлган шахсларни ишга қабул қилган тадбиркорлик субъектларига 50 миллион сўмгача субсидия ажратилиши ҳақида хабар берилган эди.