Хоманаий Исроил билан уруш бошланганидан бери илк бор омма олдида кўриниш берди

Эрон олий раҳнамоси Оятуллоҳ Али Хоманаий 5 июль куни Теҳронда шиа мусулмонлари тақвимидаги энг муҳим кун – Ашуро байрамига бағишланган диний тадбирда иштирок этди. Бу ҳақда IRNA хабар берди.

Эрон телевидениесида Хоманаийнинг видеолавҳалари намойиш этилди. Али Хоманаий Исроил Эронга қарши уруш бошлаган 13 июндан бери илк бор омма олдига чиқди. Эронлик юқори мартабали қўмондонлар ва ядро олимларининг ўлимига сабаб бўлган 12 кунлик урушда Хоманаий “хавфсиз жойда” эди. “Bild” газетаси экспертларга таянган ҳолда у бункердан чиқмаганини ёзган.

Хавфсизлик нуқтайи назаридан Хоманаий уруш пайтида олдиндан ёзиб олинган видеомурожаатларни тарқатган ва омма олдида чиқишлардан қочган.

Исроил 13 июндан бери Эронга зарба бериб, ядровий иншоотлар, юқори мартабали ҳарбий амалдорлар ва ядровий олимларни нишонга олмоқда. Эрон бунга жавобан Исроилга ракета ва учувчисиз самолётлар учирди. Қўшма Штатлар 22 июнь куни Эроннинг учта ядровий объектига зарба бериб, можарога киришди. Икки кундан кейин Эрон, олдиндан огоҳлантиргандан сўнг, Қатардаги АҚШ ҳарбий базасига ҳужум қилди. Исроил ва Эрон 24 июнь куни оташкесимга келишиб олди. Али Хоманаий 26 июнь куни эълон қилинган видеода Эрон Исроил ва АҚШни мағлуб этганини эълон қилди. Шундан сўнг АҚШ президенти Дональд Трамп Эрон олий раҳбарини “шармандали ўлим”дан қутқарганини айтди.

Эслатиб ўтамиз, аввалроқ ўз манбаларига таяниб, “The New York Times” газетаси Эрон Олий раҳнамоси Оятуллоҳ Али Хоманаий 25 кундан бери омма олдида жонли кўриниш бермаётгани, бу эса мамлакатда хавотир ва миш-мишларга сабаб бўлаётгани ҳақида ёзганди.