Холанд Роналду 232 та ўйинда эришган натижани 8 та ўйинда нақд қилди

Кеча, 2 октябрь куни Эрлинг Холанд “Манчестер Сити”нинг “Манчестер Юнайтед”га қарши ўйинида хет-трикга эришди. Бу 22 ёшли футболчининг АПЛдаги учинчи хет-триги бўлди. Холанд “Юнайтед”дан олдин “Кристал Пэлас” ва “Ноттингем Форест” дарвозасига 3 тадан гол киритган.

Холанд АПЛдаги хет-триклар сони бўйича Криштиану Роналду билан тенглашиб олди. Роналдуга ушбу натижага эришиши учун 232 та ўйин керак бўлган. Норвегиялик футболчига эса 3 та хет-трик қайд этиши учун 8 та ўйин кифоя қилган.

Премьер лига тарихида энг кўп хет-трик қайд этган футболчи Серхио Агуэро ҳисобланади. “Сити”нинг собиқ ҳужумчиси 12 марта учта голлик маррани забт этган. Серхиодан кейинги ўринларда Алан Ширер ва Робби Фаулер бормоқда. Улар мос равиш 11 ва 9 тадан хет-трикга эришган.

Умуман олганда, Холанд “Юнайтед”га қарши ўйинда фаолиятидаги ўн бешинчи хет-трикни расмийлаштирди. Эрлинг учта голлик маррани “Сити” сафида 3 марта, “Зальцбург”да 5 марта, “Боруссия Дортмунд”да 4 марта, Норвегия термасида 2 марта ва “Мольде”да 1 марта забт этган.

Маълумот учун, жорий мавсум Эрлинг Холанд “Сити” сафида 11 та учрашувда майдонга тушиб, 17 та гол урди. “Transfermakt” портали норвегиялик ҳужумчини 150 миллион еврога баҳоламоқда.