Хитойнинг янги беш йилликдаги элитаси сайланди

Хитой Коммунистик партиясининг XX қурултойида бугун, 22 октябрь куни Хитой Коммунистик партияси Марказий қўмитаси ва Интизомни текшириш марказий комиссиясининг (ИТМК) янги таркиби сайланди. Бу ҳақда ТАСС хабар берди.

Хитой Коммунистик партияси қурултойи делегатлари XX чақириқ Марказий Қшмитанинг ҳисоботи ва ИТМК ҳисоботи бўйича резолюциялар қабул қилдилар. 2,3 минг делегат ҳар иккала ҳужжатни бир овоздан қабул қилди, ҳеч ким қарши ёки бетараф овоз бермади.

Қурултойда партия низомига ўзгартиришлар киритилди. Хитой Коммунистик партиясининг амалдаги Устави 1982 йилда қабул қилинган. Ушбу ҳужжатга охирги марта 2017 йилда Хитой Коммунистик партиясининг XIX қурултойида ўзгартиришлар киритилган. Ўшанда ҳужжатга Хитой Халқ Республикаси Раиси, партия Марказий Қўмитаси Бош котиби Си Цзиньпиннинг янги даврда хитойча хусусиятга эга социализм ҳақидаги ғоялари ўрин олди.

16 октябрь куни бошланган қурултой бугун, 22 октябрь куни якунланди.

Хитой Коммунистик партияси Марказий Қўмитаси – Хитой Коммунистик партияси Миллий Қурултойи томонидан тузилган Хитой Коммунистик партиясининг олий бошқарув органи. Қурултойлар оралиғида у партия қурултойи қарорларини бажаради, партиянинг барча ишларига раҳбарлик қилади, ташқи алоқаларда партиянинг вакили ҳисобланади. Ҳар беш йилда йиғиладиган қурултой марказий қўмита (200 дан ортиқ киши)ни сайлайди.