Хитойда ўғирланган iPhone’лар биноси топилди

Хитойда ўғирланган iPhone’ларни сотиш билан шуғулланувчи компаниялар жойлашган 40 қаватли осмонўпар бино аниқланди. Бу ҳақда “Financial Times” хабар берди.

Нашрнинг суриштируви натижасида аниқланишича, турли мамлакатларда ўғирланган Apple смартфонлари охир-оқибат Хитойдаги айнан шу бинога бориб тушади. “Дунёнинг ўғирланган iPhone маркази” деган номни олган бино Feiyang Times деб аталади. У Шэньчжэндаги Хуацянбэй туманида жойлашган бўлиб, “Financial Times”нинг ёзишича, айнан шу ерда ўғирланган Apple техникаларини бутун дунё бўйлаб етказиб беришнинг муҳим маркази жойлашган.

Нашр лондонлик тадбиркор Сэм Амрани мисолини келтиради. У сайр қилиб юрган вақтида икки жиноятчи унинг қўлидан iPhone 15 Pro телефонини электровелосепедда ўтирганча юлқиб олган. У “Локатор” (Find My) функцияси ёрдамида ўз смартфонининг атиги қисқа вақт ичида босиб ўтган деярли 10 минг километрли йўлини кузата олган.

Илованинг кўрсатишича, телефон ўғирланганидан кўп ўтмай Лондоннинг яширин телефон таъмирлаш устахоналаридан бирига тушган. Сўнгра смартфон Лондон бўйлаб бир нечта манзилларда бўлган ва орадан бир ҳафта ўтиб у Гонконгда пайдо бўлган. У ердан эса тез орада Шэньчжэнга етказилган. Ниҳоят, телефон Feiyang Times биносида “саёҳатини” якунлаган.

Бундай телефонлар “тоза” қурилмаларга қараганда камроқ қийматга эга бўлса-да, ҳатто блокланган смартфонларга ҳам доимо харидорлар топилади – кимдир уларнинг эҳтиёт қисмларини сотиб олади. Шу билан бирга, Американинг ва Европанинг телефон сотувчилари бу қурилмалар у ерга қандай тушганини билмасликларини айтади.

“Financial Times” маълумотига кўра, Лондонда ҳар йили ўғирланган телефонлар “қора бозори”нинг айланмаси 65,5 миллион долларни ташкил қилади. Париж ва Нью-Йоркда ҳам бу жиноят саноати худди шундай кўламга эга.