Хитойда тошқин туфайли 80 мингдан ортиқ одам эвакуация қилинди (видео)

Хитойнинг жануби-ғарбий қисмида кучли сув тошқинлари оқибатида 80 мингдан ортиқ киши эвакуация қилинди. Бу ҳақда “Синьхуа” хабар берди.

Қайд этилишича, оммавий эвакуация Гуйчжоу провинциясининг икки туманида бошланган. У ерда тинимсиз ёғаётган ёмғирлар ва юқори оқимлардан келаётган сувлар тошқинларга сабаб бўлган.

“Жунцзян туманида вақтинча 48 минг 900 нафар аҳоли, Цунцзян туманида эса 32 минг киши эвакуация қилинди. Ҳар иккала туманда тошқинларни назорат қилиш бўйича фавқулодда ҳолатга муносабат даражаси энг юқори – 1-даражагача кўтарилди”, дейилади хабарда.

Маълумотларга кўра, Дулиу дарёсида сув сатҳи огоҳлантириш даражасидан 6,68 метрга юқорилаган.

“Ёнғин хавфсизлиги ходимлари ва кўнгиллиларни ўз ичига олган қутқарув гуруҳлари қутқарув ишларини олиб боришда қайиқ ва бошқа ускуналардан фойдаланмоқда”, дейилади хабарда.

Шунингдек, вилоятнинг фавқулодда ҳолатлар департаменти зарар кўрган ҳудудларга инсонпарварлик ёрдамини жўнатган. Улар орасида 30 минг шиша ичимлик суви ва 10 минг порция тез тайёрланадиган лағмон бўлиб, улар тезюрар поездлар ва автомобиллар ёрдамида етказилган.

“Гуйчжоудаги кучли ёмғирлар сабаб юзага келган кўчкилар оқибатида Санду туманидаги тез ҳаракатланувчи автомобиль йўлида кўприкнинг бир қисми қулаб тушди. Ҳозирча талафотлар ҳақида хабар берилмаган”, дейилади хабарда.

Эслатиб ўтамиз, аввалроқ Хитойнинг жанубидаги Гуандун ва Гуанси провинцияларида кучли ёмғирлар сабаб юзага келган тошқинлар оқибатида камида 5 киши ҳалок бўлгани ва бир нечта маҳаллий аҳоли вакили эса бедарак йўқолгани хабар қилинганди.