Хитойда магнит платформа 2 сонияда 700 км/соат тезликка чиқди

Хитойда магнит тортиш кучига эга вагон-платформа атиги икки сонияда 700 км/соат тезликка чиқди. Бу ҳақда Хитой Марказий телевидениеси хабар берди.

Телеканалга кўра, Хитой Халқ Республикасининг муҳандислари оғирлиги бир неча тонна бўлган электромагнит тортиш кучига эга вагон-платформани икки сония ичида 700 км/соат тезликкача тезлаштиришга муваффақ бўлган. Шу тариқа бундай конструксиялар бўйича жаҳон рекорди ўрнатилган.

Магнит ёстиқчада ҳаракатланувчи платформа 400 метрли синов йўлагида 700 км/соат тезликка чиққан ва шундан сўнг тўхтатилган. Маълум қилинишича, мазкур технология Хитойнинг Хунан провинцияси, Чанша шаҳрида жойлашган Мудофаа илмий-техника университети мутахассислари томонидан ишлаб чиқилган. Магнит левитация соҳасидаги тадқиқотлар ўн йил давом этган.

Хитойлик мутахассисларнинг фикрича, ушбу ишланма электромагнит тортиш кучига асосланган вакуум транспортини ривожлантириш учун янги имкониятлар очади, шунингдек, аэрокосмик техникани учириш ва синовдан ўтказишнинг янги усулларини таклиф этади. Хитой муҳандислари кўп тоннали вагон-платформани электромагнит тортиш кучи ёрдамида атиги икки сонияда 700 км/соат тезликкача тезлаштиришга муваффақ бўлган.

Эслатиб ўтамиз, аввалроқ Жанубий Кореяда соатига 370 км тезликка чиқа оладиган дунёдаги энг тезкор поездлардан бири ишлаб чиқилиши якунланганди.