Хитой Украинадаги “жосуслар” билан боғлиқ вазиятни кузатмоқда – ТИВ

Хитой Украинада махфий ҳужжатларни контрабанда йўли билан олиб чиқишга уринишда айбланиб, қўлга олинган икки фуқароси билан боғлиқ вазиятни диққат билан кузатмоқда. Бу ҳақда мамлакат Ташқи ишлар вазирлигининг расмий вакили Мао Нин баёнот берди.

Унинг айтишича, ҳолат назорат остида ва Киев томонидан илгари сурилган айбловлар ҳозирда текширилмоқда.

“Агар гап Хитой фуқаролари ҳақида кетаётган бўлса, уларнинг қонуний ҳуқуқлари тегишли тарзда ҳимоя қилиниши керак”, дейди Мао.

Эслатиб ўтамиз, аввалроқ Украина Хавфсизлик хизмати ўзининг қарши разведка бўлинмаси томонидан Хитой Халқ Республикасининг икки нафар фуқароси қўлга олинганини хабар қилганди. Улар Украинанинг ракета мажмуаси – R-360МC “Нептун”га оид махфий ҳужжатларни Хитойга ноқонуний равишда олиб чиқмоқчи бўлганликда гумон қилинмоқда.

Мазкур ракета мажмуаси 2022 йилнинг апрель ойида Россия Қора денгиз флоти флагмани – “Москва” крейсерини чўктиришда қўллангани билан танилган.