Хитой фойдасига жосуслик қилган АҚШ разведкаси таҳлилчиси айбини тан олди

Ўта махфий ҳарбий сирларни Хитой агентига 40 минг долларга сотганликда гумонланган АҚШ армияси разведкаси таҳлилчиси Корбейн Шульц айбига иқрор бўлди. Бу ҳақда АҚШ Адлия вазирлиги хабар берди.

Ўта махфий рухсатномага эга бўлган Корбейн Шульцга миллий мудофаа бўйича нозик мaълумотларни, жумладан, АҚШ ҳарбий қурол тизимларига оид эксперт томонидан бошқариладиган техник маълумотларни Гонконгдаги Хитой ҳукумати билан алоқаси бор деб ҳисоблаган шахсга бериш айби қўйилган.

Март ойида Шульцга қўйилган айбловлар орасида миллий мудофаага оид маълумотларни ошкор қилиш учун тил бириктириш, мудофаа буюмларини лицензиясиз экспорт қилиш ва давлат амалдорига пора бериш кабилар ҳам бор.

Суд ҳужжатларида аниқланишича, Шульц Хитой агентига армиянинг Украина урушидан олган сабоқлари, Тайваннинг потенциал мудофаа режалари, Хитой ҳарбий тактикаси ҳақидаги разведка маълумотлари ва АҚШ ҳарбий сунъий йўлдошлари имкониятлари ҳақидаги тафсилотларни ўз ичига олган нозик маълумотларни тақдим этган.

“Хитой каби ҳукуматлар бизнинг ҳарбий хизматчиларимиз ва миллий хавфсизлик маълумотларини агрессив тарзда нишонга олмоқда ва биз маълумотларнинг душман хорижий ҳукуматларидан ҳимояланишини таъминлаш учун қўлимиздан келган барча ишни қиламиз”, дейди ФҚБ ижрочи директори ёрдамчиси Роберт Уэллс.

Бош прокурор ёрдамчиси Мэттью Олсеннинг қўшимча қилишича, ушбу судланувчи АҚШдан ташқарида яшовчи шахсга миллий мудофаа маълумотларини узатиш учун тил бириктириб, Қўшма Штатлар ҳарбийларининг унга бўлган ишончини суиистеъмол қилган ва мамлакат миллий хавфсизлигини катта хавф остига қўйган.

Зебо Туробжонова