Хави “Барселона”дан кетди

Бугун, 24 май куни “Барселона” бош мураббийи Хави жамоа бош мураббийлигидан бўшатилди. Бу ҳақда футбол журналисти Фабрицио Романо ўз X саҳифасида хабар берди.

Манбага кўра, шахсан клуб президенти Жоан Лапорта Хавини ишдан бўшатилганини эълон қилган.

“Барселона"ни катта эҳтимол билан Германия терма жамоаси ва “Бавария”нинг германиялик собиқ устози Ханс-Дитер Флик бошқаради. Каталония клуби у билан икки йиллик шартнома имзолаш борасида келишувга эришган.

Маълумот учун, “Барселона” мавсум якунига қадар 82 очко жамғариб, Испания чемпионати турнир жадвалида 2-ўринни эгаллади. Жамоа Ла Лиганинг сўнгги турида “Севилья” билан тўқнаш келади. Испания кубогида Хави шогирдлари турнирнинг якуний ғолиби Бильбаонинг “Атлетик” клубига имкониятни бой бериб, 1/4 финал босқичида тўхтади. Европа Чемпионлар лигасида каталонияликлар чорак финалда Франциянинг ПСЖ жамоасига умумий ҳисобда мағлуб бўлди. Испания Суперкубоги финалида эса азалий рақиби “Реал”га  ютқазди (1:4).