Keniyadagi maktab yotoqxonasida dahshatli yong‘in bo‘ldi

Keniyada qizlar maktabida kecha, 28 may kuni yuz bergan yirik yong‘in oqibatida 16 nafar o‘quvchi halok bo‘ldi, yana o‘nlab kishi jarohat oldi. Hodisa Gilgil shahridagi Utumishi Girls Academy maktabida sodir bo‘lgan, politsiya bu voqeani “ehtimoliy ataylab uyushtirilgan yong‘in” sifatida tekshirmoqda. Bu haqda BBC xabar berdi.

Rasmiy ma’lumotlarga ko‘ra, yong‘in kecha, 28 may kuni tong saharda, Nayrobidan taxminan 120 kilometr shimoli-g‘arbda joylashgan maktab yotoqxonasining yuqori qavatida boshlangan. Olov tezda tarqalib, 135 ta ikki qavatli karavot joylashgan binoni qamrab olgan. Hodisa vaqtida yotoqxonada yuzlab o‘quvchilar bo‘lgan.

Politsiya tergovlari davomida maktabdagi CCTV kameralar yozuvlari o‘rganilgan hamda o‘quvchilar va xodimlar bilan suhbatlar o‘tkazilgan. Natijada 8 nafar o‘quvchi yong‘inni rejalashtirish va amalga oshirishda “asosiy gumonlanuvchilar” sifatida aniqlanib, hibsga olingan. Ular dastlab maktab hududidan chiqib ketgani va keyinchalik qaytib ushlangani ham ma’lum qilingan.

Tergov doirasida yana 30 nafar o‘quvchi so‘roq qilinib, hodisa tafsilotlari aniqlashtirilgan. Politsiya yong‘inning aniq sababi hali to‘liq tasdiqlanmaganini, biroq barcha versiyalar, jumladan ataylab yoqish ehtimoli ham ko‘rib chiqilayotganini bildirgan.

Ta’lim vaziri Julius Ogamba maktabda jiddiy xavfsizlik qoidalari buzilganini tasdiqlagan. Uning aytishicha, yotoqxonalarda haddan tashqari ko‘p o‘quvchi joylashtirilgan, ayrim chiqish eshiklari esa yopiq bo‘lgan. Bu esa yong‘in vaqtida evakuatsiyani murakkablashtirib, katta talafotga sabab bo‘lgan. Vazirlik maktab boshqaruv kengashini tarqatib yubordi hamda maktab direktori va mas’ul shaxslarga nisbatan intizomiy va huquqiy choralar ko‘rilishini ma’lum qildi. Rasmiylar xavfsizlik standartlarini buzgan har qanday shaxs javobgarlikka tortilishini ta’kidlamoqda.

Hodisa joyida ota-onalar va qarindoshlar yaqinlaridan xabar olish umidida to‘plangan. Guvohlarning aytishicha, maktab hududida tartibsizlik va chuqur qayg‘u hukm surgan. Ayrim ota-onalar farzandlarining taqdiridan bexabar qolayotganini, ba’zilar esa ularning shifoxonaga yoki o‘likxonaga olib ketilganini eshitganini aytmoqda.

Jarohatlangan 79 nafar o‘quvchidan bir qismi og‘ir ahvolda bo‘lib, yetti nafari maxsus davolanish uchun Nayrobiga jo‘natilgan. Qolganlar esa shifoxonalarda davolanib, ayrimlari uylariga chiqarilgan.

Halok bo‘lganlarning jasadlari aniqlash uchun DNK ekspertizasiga yuborilgan.

Rasmiylar ushbu fojia bo‘yicha tergov davom etayotganini va barcha aybdorlar aniqlanib, qonun oldida javob berishini bildirmoqda. Hodisa esa mamlakat ta’lim tizimidagi xavfsizlik standartlari qay darajada muhim ekanini yana bir bor kun tartibiga olib chiqqan.